"بۇگىنگى كەزدەسۋ دوستىق جانە ىنتىماقتاستىق تۋرالى كەلىسىمنىڭ 30 جىلدىعى قارساڭىندا ءوتىپ جاتىر. مۇنىڭ سيمۆولدىق ءمانى بار. جاقىندا عانا ارىپتەسىم رەجەپ بەيمەن تەلەفون ارقىلى سويلەستىم. ءبىز ۇنەمى حابارلاسىپ وتىرامىز. سوندىقتان ەكى ەل اراسىنداعى ديالوگ وتە جاقسى دامىپ كەلە جاتىر. جالپى، تۇركيا – قازاقستاننىڭ ەڭ ءىرى بەس ساۋدا سەرىكتەسىنىڭ ءبىرى. سونىمەن قاتار باستى 10 ينۆەستوردىڭ قاتارىنا كىرەدى. بىلتىر ەكىجاقتى ساۋدا-ساتتىق كولەمى 6 ميلليارد دوللارعا جەتتى. ءبىراق مۇنىمەن توقتاپ قالۋعا بولمايدى. قارىم-قاتىناسىمىزدىڭ الەۋەتى وتە زور. سوندىقتان كەلەشەكتە ءوزارا ساۋدا اينالىمى 10 ميلليارد دوللارعا جەتەتىنىنە ەشقانداي كۇمانىمىز جوق"، – دەدى پرەزيدەنت.

ال نۋمان كۋرتۋلمۋش اتاجۇرتتا تۇرىك دەلەگاسياسىنا كورسەتىلگەن سىي-قۇرمەت ءۇشىن ريزاشىلىعىن ءبىلدىردى.

"قازاقستان – ءبىزدىڭ اتاجۇرتىمىز ءارى تۇركى حالقىنا ورتاق رۋحاني تۇلعا قوجا احمەت ءياساۋيدىڭ وتانى. ءبىز تۇركىستان قالاسىنا جول ءجۇرىپ، قاسيەتتى ورىندارعا زيارات ەتەمىز جانە قوجا احمەت ياساۋي اتىنداعى قازاق-تۇرىك حالىقارالىق ۋنيۆەرسيتەتىندە كونفەرەنسيا وتكىزەمىز. قازاقستان ءسىزدىڭ باسشىلىعىڭىزبەن دامۋدىڭ جاڭا كەزەڭىنە قادام باستى. ەلىڭىزدە تابىستى ساياسي-ەكونوميكالىق، الەۋمەتتىك رەفورمالار ءجۇرىپ جاتىر. مۇنىڭ ءبارى قازاقستاننىڭ وركەندەۋىنە وڭ ىقپالىن تيگىزەدى دەپ ويلايمىن. الداعى ۋاقىتتا تۇركيا مەن قازاقستان اراسىنداعى ىنتىماقتاستىق ودان ءارى نىعايا تۇسەتىنىنە سەنىمدىمىن. ەكى ەلدىڭ ساۋدا، تەحنولوگيا، ونەركاسىپ، لوگيستيكا، ەنەرگەتيكا جانە اۋىل شارۋاشىلىعى سالالارىنداعى الەۋەتى زور"، – دەدى تۇركيا ۇلتتىق ءماجىلىسىنىڭ ءتوراعاسى.

قاسىم-جومارت توقايەۆ پەن نۋمان كۋرتۋلمۋش ەكى ەلدىڭ حالىقارالىق ۇيىمدار اياسىنداعى ىقپالداستىعىن كۇشەيتۋ جانە تۇركى مەملەكەتتەرى ۇيىمىنا مۇشە باۋىرلاس ەلدەردىڭ ءوزارا ىنتىماعىن نىعايتۋ جونىندە پىكىر الماستى. سونداي-اق تۇركيا ەلىنىڭ باسشىلىعىمەن الداعى كەزەڭگە جوسپارلانعان جوعارى دەڭگەيدەگى كەزدەسۋلەر پىسىقتالدى.

كەزدەسۋ سوڭىندا مەملەكەت باسشىسى تۇرىك سپورتشىلارى مەن دەلەگاسياسى بيىل قىركۇيەك ايىندا استانادا وتەتىن V دۇنيەجۇزىلىك كوشپەندىلەر ويىندارىنا بەلسەندى قاتىساتىنىنا سەنىم ءبىلدىردى.