مادەنيەتتانۋشى-عالىم، ديپلومات، مەملەكەت جانە قوعام قايراتكەرى مۇرات اۋەزوۆ 82 جاسىندا قايتىس بولدى. 

اقپاراتتى الماتى قالاسى مادەنيەت باسقارماسى راستادى.

مۇرات اۋەزوۆ 1943 جىلعى 1 قاڭتاردا جامبىل وبلىسى مەركى اۋىلىندا دۇنيەگە كەلگەن. ول – قازاق ادەبيەتىنىڭ كورنەكتى جازۋشىسى، دراماتۋرگ، عالىم، قازاقتىڭ تۇڭعىش "اباي جولى" رومان-ەپوپەياسىنىڭ اۆتورى مۇحتار اۋەزوۆتىڭ ۇلى.

مۇرات اۋەزوۆ 1965 جىلى م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ شىعىس تىلدەرى ينستيتۋتىن فيلولوگ-شىعىستانۋشى ماماندىعى بويىنشا بىتىرگەن. قازاقستان ءوز تاۋەلسىزدىگىن جاريالاعان كەزدە ەلدى وزگەرتۋگە بەلسەنە قاتىسقان. پارلامەنت دەپۋتاتى بولىپ، ادەبي زەرتتەۋلەرمەن اينالىستى، قازاقستان رەسپۋبليكاسىنىڭ جۇڭگو حالىق رەسپۋبليكاسىنداعى تۇڭعىش ەلشىسى قىزمەتىن اتقاردى.

ول – كوركەمدىك پروسەستىڭ تەورياسى مەن پراكتيكاسى بويىنشا 200-دەن استام جاريالانىمنىڭ، سونداي-اق "ۋاقىت بايلانىستىرۋشى - ءجىپ"، "يپپوكرەنا. ۋاقىت قۇدىقتارىنا بارۋ" جانە "قايتۋ ءۇشىن كەتۋ" مونوگرافيالارىنىڭ اۆتورى.

مۇرات اۋەزوۆ 2007 جىلدان بەرى مۇحتار اۋەزوۆ اتىنداعى قوردى باسقارىپ كەلدى.