بۇل – XXI عاسىر. ءبىز وركەنيەتتى قوعامدا ءومىر ءسۇرىپ جاتىرمىز دەيمىز وزەۋرەپ. اڭگىمە ۋاقىت ءتىلىنىڭ XXI عاسىردى كورسەتۋىندە ەمەس. داتا مەن سيفرلاردىڭ اۋىسۋى ءبىر نارسەنى وزگەرتەتىنى راس بولسا، بۇگىندەرى ءۇندىستانداعى بەس ميلليون ادامنىڭ سيىرعا تابىنۋىن قانداي قيسىندارمەن تۇسىندىرۋگە بولادى؟ الدە، سيىردىڭ قۇداي ەمەستىگىن ءتۇسىنۋ ءۇشىن تاعى دا ءتورت مىڭ جىل ءوتۋى كەرەك پە ەكەن؟
ەندىگى ءسوزدى وركەنيەت ۇعىمىنا قاراي بۇرساق. ءبىز وركەنيەت دەپ نەنى ايتىپ وتىرمىز ءوزى؟ اق كويلەكتىڭ سىرتىنا قارا كوستيۋم كيىپ الىپ، ءماز بولىسىپ مەرسەدەس مىنگەندىگىمىزدى مە، الدە ينتەرنەتكە قوسىلعان ايفون التى تەلەفونىمىزدىڭ بار ەكەندىگىن بە؟ جوق، بولماسا ىشىندە باسسەينى بار بيىك كوتتەدجدە تۇراتىنىمىز تۋرالى ما؟
ال سانامىز بەن پاراساتىمىزدىڭ كوكجيەگى شە؟
ونىڭ قانداي جەتىستىكتەرىن ايرىقشا اتاپ، العا تارتقان بولار ەدىك؟
انايى بولسا دا، ايتپاسقا لاجىمىز جوق. باسقاسىن ايتپاعاندا، دارەت سىندىرعانىڭنان اقشا جاسايتىن بۇل قوعامدى وركەنيەتتى دەۋگە ءداتىڭنىڭ بارماسى انىق.
ءالميساقتان ءوزى، وركەنيەت دەگەنىمىز سانا مەن رۋحتىڭ جەتىستىگى بولاتىن. ەندەشە، ەش وكپەلەمەۋگە ءتيىسپىز. ار مەن ۇيات، وبال مەن ساۋاپ تۇرعىسىنان XVIII عاسىردىڭ تۋمالارى قۇنانباي مەن شوڭ بيلەر بۇگىنگى بىزدەردەن الدەقايدا وركەنيەتتى.
قىزىق، اياق استىنان المانيا مەن جاپونيا اۆتوكولىكتەرىن ەكسپورتتاۋدان باس تارتىپ، ءبىر جىلعا دەرلىك ينتەرنەت جەلىسى ىستەن شىقتى دەلىك (ارينە، ولاي بولۋى مۇمكىن بولماسا دا). سوندا باعاناعى «بۇل – XXI عاسىر. ءبىز وركەنيەتتى قوعامدا ءومىر ءسۇرىپ جاتىرمىز» دەپ شىرەنگەن «قاعيداسىماعىمىز» قايدا قالدى؟ ءبىز بۇل «حاوستان» جالعان كوزقاراستاردى جامىلعان حالىقتىڭ ادەمى (دۇرىسى تىرجالاڭاش) وتىرىكتەرگە عانا الدانىپ وتىرعاندىعىنا كوزىمىزدى جەتكىزگەن بولار ەدىك.
ىقىلاس وجاي ۇلى
