ەندى ناۋقاستىڭ سوزىلمالى اۋرۋى قوزىپ، دەنساۋلىعىنا تىكەلەي جانە ىقتيمال ءقاۋىپ تونبەسە ءتۇننىڭ ورتاسىندا جەدەل جاردەم شاقىرا المايدى.

اشىق نقا پورتالىنا «جەدەل مەديسينالىق جاردەم، ونىڭ ىشىندە مەديسينالىق اۆياسيانى تارتا وتىرىپ، كورسەتۋ قاعيدالارىن بەكىتۋ تۋرالى» بۇيرىقتىڭ جاڭا جوباسى جارىق كوردى. قۇجات 8 قازانعا دەيىن تالقىلانادى.

«شۇعىلدىقتىڭ 4-ساناتىنا شاقىرتۋلار كەلىپ تۇسكەن كەزدە جمك ستانساسىنىڭ ديسپەچەرى اۆتوماتتاندىرىلعان باسقارۋ جۇيەسى ارقىلى شاقىرتۋلاردى مەديسينالىق-سانيتاريالىق العاشقى كومەك كورسەتەتىن دەنساۋلىق ساقتاۋ ۇيىمدارىنىڭ (بۇدان ءارى – مساك ۇيىمدارى) ءموبيلدى بريگادالارىنا ولاردىڭ جۇمىس ۋاقىتىندا (جۇمىس كۇندەرى ساعات 08:00-دەن 18:00-گە دەيىن) بەرەدى.

مساك ۇيىمىنا قايتا جىبەرىلۋگە جاتاتىن شاقىرۋلاردى تىركەۋ جۇمىس كۇندەرى ساعات 8.00-دەن 18.00-گە دەيىن، سەنبى كۇنى ساعات 8.00-دەن 12.00-گە دەيىن جۇزەگە اسىرىلادى.

جەدەلدىكتىڭ 4-ساناتىن شاقىرۋ دەگەنىمىز – پاسيەنتتىڭ ءومىرى مەن دەنساۋلىعىنا تىكەلەي جانە ىقتيمال قاتەر بولماعان كەزدە، اعزالار مەن جۇيەلەردىڭ كەنەتتەن جانە ايقىن بۇزىلۋىنسىز، ءجىتى اۋرۋدان نەمەسە سوزىلمالى اۋرۋدىڭ شيەلەنىسۋىنەن تۋىنداعان پاسيەنتتىڭ جاي-كۇيى»، – دەلىنگەن قۇجات جوباسىندا.

دەنساۋلىق ساقتاۋ مينيسترلىگى بۇيرىق جوباسىنا قاتىستى تۇسىنىكتەمە بەردى.

"مينيسترلىك ازاماتتاردىڭ جەدەل جاردەمنىڭ كەلۋىنىڭ كەشىگۋى تۋرالى كوپتەگەن وتىنىشتەرىنە جاۋاپ رەتىندە تالداۋ جۇرگىزىپ، جاعدايدى جاقسارتۋ ءۇشىن شەشىمدەر ۇسىنادى. تالداۋ ناتيجەلەرى شاقىرتۋلاردىڭ 50 پايىزدان استامى شۇعىلدىقتىڭ ءتورتىنشى ساناتىنا جاتاتىنىن كورسەتتى، بۇل ەمحانالاردى قوسا العاندا، مەديسينالىق-سانيتاريالىق العاشقى كومەك ۇيىمدارىنىڭ (مساك) باقىلاۋىنداعى سوزىلمالى اۋرۋلارى بار پاسيەنتتەرگە قىزمەت كورسەتۋدى بىلدىرەدى. وسىعان بايلانىستى مينيسترلىك مەديسينالىق-سانيتاريالىق العاشقى كومەك كورسەتۋ ستاندارتىنا جانە جەدەل مەديسينالىق كومەك كورسەتۋ قاعيدالارىنا وزگەرىستەر جوباسىن ازىرلەدى. وزگەرىستەر كەيبىر ب ا ق دۇرىس جەتكىزبەگەندەي، ۇيدە قىزمەت كورسەتۋدى توقتاتۋدى بىلدىرمەيدى، كەرىسىنشە مەديسينالىق قىزمەتتەردىڭ قولجەتىمدىلىگى مەن ساپاسىن جاقسارتۋعا باعىتتالعان.

دارىگەردى ۇيگە شاقىرتۋلاردى تىركەۋگە جانە ۇيدەگى ستاسيونارلاردى ۇيىمداستىرۋعا قاتىستى تارماقتار قۇجاتتىڭ قۇرىلىمىن جاقسارتۋ ءۇشىن جوبانىڭ باسقا بولىمىنە اۋىستىرىلدى، ءبىراق ولار كۇشىندە قالادى. مساك-تىڭ مەديسينا قىزمەتكەرلەرى الدىڭعى ستاندارتتىڭ شەڭبەرىندە ۇيدە كومەك كورسەتۋدى جالعاستىرادى.

دەنساۋلىق ساقتاۋ مينيسترلىگى قىزمەت كورسەتۋ ساپاسى مەن ازاماتتاردىڭ قاناعاتتانۋشىلىعىن ارتتىرۋ ءۇشىن مەديسينالىق كومەك كورسەتۋ جۇيەسىن جەتىلدىرۋ بويىنشا جۇمىستى جالعاستىرادى"، – دەلىنگەن حابارلامادا.