كەشتىڭ كىرىسپە ءسوزىن اباي عىلىمي-زەرتتەۋ ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى، پروفەسسور جانعارا دادەبايەۆ باستاپ، قوناقتار مەن قاتىسۋشى ستۋدەنتتەردى بىرلەستىكتىڭ تاريحىمەن تانىستىرىپ، ءىسشارانىڭ ءساتتى وتۋىنە تىلەك ءبىلدىردى. ادەبي-تانىمدىق كەشتىڭ ءقادىرلى قوناقتارى ءال-فارابي اتىنداعى قازاق ۇلتتىق ۋنيۆەرسيتەتى فيلولوگيا فاكۋلتەتىنىڭ اعا ەدۆايزەرى، اعا وقىتۋشى شوقان شورتانبايەۆ، فيلولوگيا عىلىمدارىنىڭ كانديداتى، اعا وقىتۋشى سوۆەتحان تىلەۋبايەۆ، مەحانيكا-ماتەماتيكا فاكۋلتەتىنىڭ اعا ەدۆايزەرى، دوسەنت بولات ابەنوۆ، مەديسينا جانە دەنساۋلىق ساقتاۋ فاكۋلتەتىنىڭ اعا ەدۆايزەرى گۇلبانۋ ءارىنوۆا كەش بارىسىندا ادەبي بىرلەستىكتىڭ الداعى شىعارماشىلىق جۇمىسىنا اق جول تىلەپ، جىلى لەبىزدەرىن جولداپ وتىردى. فيلولوگيا فاكۋلتەتىنىڭ 1-كۋرس ستۋدەنتتەرى ۇلى اباي ولەڭدەرىن جانە ءوز شىعارماشىلىقتارىنان ولەڭ جولدارىن جاتقا وقىپ، «اباي جولى» رومان-ەپوپەياسىنداعى «قايتقاندا» تاراۋىنان ساحنالىق قويىلىم كورسەتتى. حورمەن «كوزىمنىڭ قاراسى» ءانىن ناقىشىنا كەلتىرە ورىنداپ، مۇحتار اۋەزوۆتىڭ «ايەلدەر گالەرەياسىنان» مونولوگ ءۇزىندىسىن، ابايدىڭ وزگە تىلگە اۋدارىلعان ولەڭدەرىن وقىدى، مەحانيكا-ماتەماتيكا فاكۋلتەتىنىڭ ستۋدەنتتەرى «ەركە سىلقىم» كۇيىن شەرتتى. كەشتى اباي عىلىمي-زەرتتەۋ ينستيتۋتىنىڭ جەتەكشى عىلىمي قىزمەتكەرى، پروفەسسور م.ا. تورەگەلدى تۇياقباي جانە فيلولوگيا عىلىمدارىنىڭ كانديداتى، دوسەنت ءلايلا مۇسالى قورىتىندى سوزبەن ءتامامداپ، قاتىسۋشىلارعا العىس ءبىلدىردى. اتالمىش كەش قوس ساناتكەر اباي قۇنانباي ۇلى مەن مۇحتار اۋەزوۆتىڭ شىعارماشىلىق مۇراسى مەن ۇندەستىگىنەن سىر شەرتىپ، جاس بۋىننىڭ ادەبي-تانىمدىق ءبىلىمىن ارتتىردى.
جۇمىسىن 1941 جىلدىڭ مامىرىندا ۇلى قالامگەردىڭ ءوز جەتەكشىلىگىمەن باستاعان ادەبي بىرلەستىكتىڭ قايتا جاندانۋى ادەبيەتكە قۇمار ستۋدەنتتەردىڭ جاڭا بەلەستەرگە ۇمتىلۋىنا، شىعارماشىلىق جانە تانىمدىق تۇرعىدا دامۋىنا نەگىز بولماق. بۇل – قازاق ادەبيەتىنىڭ عانا ەمەس، ۇلتتىق رۋحانياتتىڭ وركەندەۋىنە مول ۇلەس قوساتىن يگىلىكتى ءىس ەكەنى داۋسىز!
ءال-فارابي اتىنداعى قازۇۋ
فيلولوگيا عىلىمدارىنىڭ
كانديداتى، دوسەنت ل. مۇسالى
اباي عىلىمي-زەرتتەۋ ينستيتۋتىنىڭ
كىشى عىلىمي قىزمەتكەرى ە. ەلدوس،
فيلولوگيا فاكۋلتەتىنىڭ 1-كۋرس دوكتورانتى،
جوو-عا دەيىنگى دايىندىق كافەدراسىنىڭ
اعا وقىتۋشىسى گ.م. مۋجيگوۆا
پىكىر قالدىرۋ