ءبىلىم بەرۋ ينفراقۇرىلىمىن قولداۋ قورى ەسەبىنەن 22 مىڭ وقۋشى ورنىنا ارنالعان تاعى 28 جاڭا مەكتەپ سالىنادى.

بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى مالىمدەدى.

مەملەكەت باسشىسىنىڭ تاپسىرماسى بويىنشا قۇرىلعان قور جەمقورلاردان تاركىلەنگەن قاراجات ەسەبىنەن تولىقتىرىلىپ كەلەدى. ونىڭ نەگىزگى ماقساتى ءبىلىم بەرۋ ۇيىمدارى ءۇشىن جاڭا عيماراتتار سالۋ، كەڭەيتۋ ارقىلى اپاتتى مەكتەپتەر مەن ورىن تاپشىلىعىن جويۋ.

مەملەكەت بالالار ءۇشىن قولايلى جاعداي جاساۋعا ەرەكشە كوڭىل ءبولىپ كەلەلى. بۇگىنگى تاڭدا 74،4 مىڭ ورىندىق 61 مەكتەپ پايدالانۋعا بەرىلدى، ونىڭ 29-ى اۋىلدىق ەلدى مەكەندەردە ورنالاسقان، - دەپ اتاپ ءوتتى ينفراقۇرىلىمدى دامىتۋ دەپارتامەنتىنىڭ باسقارما باسشىسى جايىق ماحسۋتوۆ.

2024 جىلى 25 مەكتەپ سالىندى، ولاردىڭ باسىم بولىگى استانا قالاسىندا، جانە ماڭعىستاۋ، الماتى، جامبىل وبلىستارىندا ورنالاسقان. بارلىق ءبىلىم بەرۋ ۇيىمدارى زاماناۋي قۇرال-جابدىقتارمەن جابدىقتالعان. ەستەرىڭىزگە سالا كەتەيىك، ءبىلىم بەرۋ ينفراقۇرىلىمىن قولداۋ قورىنىڭ ەسەبىنەن 100 مىڭعا جۋىق وقۋشى ورىندىق 89 مەكتەپتىڭ قۇرىلىسى قارجىلاندىرىلدى.