2025 جىلدىڭ العاشقى ءۇش ايىندا الماتىدا ساموكاتتارعا قاتىستى بولعان 13 جول-كولىك وقيعاسى تىركەلدى. بارلىق جاعدايدا جاراقات العاندار بار، 13 ادام زارداپ شەككەن.

ال 2024 جىلى قالادا ساموكاتتاردىڭ قاتىسۋىمەن 156 جول-كولىك وقيعاسى تىركەلىپ، 162 ادام جاراقات العان.

"جول اپاتتارىنىڭ الدىن الۋ ماقساتىندا پوليسيا تاراپىنان ءبىرقاتار اۋقىمدى شارالار وتكىزىلدى. اتاپ ايتقاندا، وسى كەزەڭدە جول قوزعالىسى ەرەجەلەرىن بۇزعانى ءۇشىن 1 401 ساموكات جۇرگىزۋشىسى اكىمشىلىك جاۋاپكەرشىلىككە تارتىلدى. بۇل بىلتىرعى سايكەس كەزەڭىمەن سالىستىرعاندا ەكى ەسە كوپ"، – دەپ حابارلادى قۇقىق قورعاۋ ورگاندارى.

الايدا پوليسيا قىزمەتكەرلەرىنىڭ ايتۋىنشا، "ءار ساموكات جۇرگىزۋشىسىنىڭ جانىنا ينسپەكتور قويۋ مۇمكىن ەمەس". سوندىقتان قازىرگى ۋاقىتتا باستى نازار الدىن الۋعا، ەسكەرتۋ مەن ءتۇسىندىرۋ جۇمىستارىنا اۋدارىلىپ وتىر. پوليسيا بارلىق جول قوزعالىسىنا قاتىسۋشىلاردى تارتىپكە جانە جەكە جاۋاپكەرشىلىككە شاقىرادى.

"ساموكات جۇرگىزۋشىلەرى – جول قوزعالىسىنىڭ تولىققاندى قاتىسۋشىلارى ەكەنىن ءتۇسىنۋى ءتيىس جانە بەلگىلەنگەن ەرەجەلەردى ساقتاۋعا مىندەتتى.

ەرەسەكتەردىڭ جالعا الىنعان ساموكاتتاردى كامەلەتكە تولماعان بالالارعا بەرۋى – ەرەكشە الاڭداۋشىلىق تۋعىزىپ وتىر. بۇل – جول بەرۋگە بولمايتىن جاعداي! بالالاردا كولىك قۇرالىن باسقارۋ تاجىريبەسى مەن داعدىسى جەتكىلىكسىز، ولار قاۋىپ-قاتەر دەڭگەيىن تولىق تۇسىنە بەرمەيدى. مۇنداي جاعدايلار قايعىلى اياقتالعان وقيعالارعا دا الىپ كەلگەن"، – دەپ تولىقتىردى الماتى پد.