شەرزات پولات قاتىگەزدىكپەن ولتىرىلگەن ءتۇنى ونىڭ اناسى گۇلبارا سوتتالۋشىلاردىڭ اراسىندا ەكى قىزدىڭ جۇرگەنىن انىق كورگەن. شەرزاتتىڭ اناسى جاۋاپ بەرۋ بارىسىندا ەكى قىزدىڭ توبەلەس كەزىندە نە ىستەپ جۇرگەنىن ايتىپ بەردى.
“قىزدار دۇكەننىڭ ماڭىندا بولدى. ولارعا قاراپ، جەدەل جاردەم مەن پوليسيا شاقىرۋىن سۇرادىم. ءبىراق ولار ماعان قاراپ تۇردى. ەشتەڭە ىستەگەن جوق. ابزال مەن نۇرقياس مەنىڭ قولىمنان ۇستاپ تۇرعاندا ەكى قىز ماعان تاس لاقتىردى. ول قىزداردى كورسەم تانيمىن”، – دەدى گۇلبارا بيشەمبايەۆا.
وقيعا بولعان ءتۇنى سوتتالۋشىلاردان بولەك وندا ەكى قىزدىڭ جۇرگەنىن بەينەكامەرادان كورۋگە بولادى. الايدا ولار بۇگىندە ايىپتالۋشىلاردىڭ قاتارىندا ەمەس.
“جولداسىم توبەلەس باستالىپ كەتكەن كەزدە جەدەل جاردەم مەن پوليسيا شاقىرعان. ءبىراق ولار تۇتقانى المادى. باسقا ۇيدەگى ادامدار شىققان كەزدە كۇيەۋىم كولىكتى ايداپ كەلدى. كولىككە ءبىرىنشى شەرزاتتى، ەكىنشى نۇرعاناتتى سالىپ تالعاردىڭ اۋرۋحاناسىنا اپاردىق. ۇلىمنىڭ اۋزىنان قان كەتكەنىن كورگەندە ولەدى دەپ ويلادىم. ءبىراق سوندا دا ءۇمىتىمدى ۇزگەن جوقپىن. شەرزاتتىڭ قولىنداعى بىلەگىندەگى پىشاقپەن كەسىلگەن جاراقاتتاردى كوردىم. ول جاراقاتتاردى سوتتالۋشىلاردىڭ ءبارى سالدى. ءراۆيلدىڭ نۇرعاناتقا پىشاق سالعانىن كوردىم. مىلتىقتى كىم اكەلگەنىن بىلمەيمىن. ءبىراق ول نۇرقياستىڭ قولىندا بولدى”، – دەدى شەرزاتتىڭ اناسى.
