ۇكىمەت وتىرىسىندا QazaqGaz باسقارما ءتوراعاسى سانجار جاركەشوۆ تەك وڭ ناتيجەلەردى بايانداعان سوڭ، پرەمەر-مينيستر ولجاس بەكتەنوۆ ودان پروبلەمالىق ماسەلەلەردى اشىق ايتۋىن تالاپ ەتتى.

ۇكىمەت وتىرىسىندا QazaqGaz ۇلتتىق كومپانياسىنىڭ باسقارما ءتوراعاسى سانجار جاركەشوۆ بايانداما جاسادى. كەيىن ۇكىمەت باسشىسى ولجاس بەكتەنوۆ كومپانيا باسشىسىنا ەسكەرتۋ جاسادى.

جۇمىستارىڭىزدا ەشقانداي ماسەلە جوق پا سوندا؟ تەك قانا جۇمىستىڭ وڭ ناتيجەلەرىن كورسەتتىڭىز. پروبلەمالىق ماسەلەلەردى كوبىرەك ايتۋ قاجەت. جارىققا شىعارىپ، تالقىلاۋ قاجەت. بار ما مۇنداي ماسەلە؟، — دەپ سۇرادى پرەمەر-مينيستر.

جاركەشوۆ قاشاعان زاۋىتىنداعى باياۋ جۇمىس تۋرالى ايتتى.

قاشاعانداعى وڭدەۋ زاۋىتىنىڭ ماسەلەلەرى بولدى. ونىڭ قۇرىلىس جۇمىستارى باياۋ جۇرگەن ەدى. قازىرگى تاڭدا باسقا مەردىگەر كەلگەلى بەرى قۇرىلىس ماسەلە شەشىلىپ، 100 پايىز جابدىقتار قىتايدان كەلدى. قۇرىلىس ۇلعايتىلدى. ءقازىر بەلگىلەنگەن مەرزىمدە قۇرىلىستى اياقتاۋدى جوسپارلاپ وتىرمىز، — دەدى سانجار جاركەشوۆ.