قازاقستاندا جەمقورلىققا قارسى كۇرەستى كۇشەيتۋ ماقساتىندا، جەمقورلاردىڭ تۋىستارى مەن جاقىندارىنىڭ مۇلكىن تاركىلەۋ ۇسىنىلدى. بۇل ۇسىنىس، ەگەر ولار مۇلىكتى زاڭدى جولمەن يەلەنگەندىگىن دالەلدەي الماسا، جۇزەگە اسىرىلۋى مۇمكىن. بۇل جونىندە ءماجىلىس دەپۋتاتى مارات باشيموۆ Facebook پاراقشاسىندا جازدى.

"قازىرگى تاڭدا ماجىلىستە اقشانى جىلىستاتۋعا قارسى زاڭ جوباسى ءبىرىنشى وقىلىمعا شىعارىلماق. وعان حالىقارالىق ۇيىم – فاتف ۇسىنعان جۇزگە جۋىق تۇزەتۋ مەن قۇقىقتىق نورمالار ەنگىزىلگەن. "كەڭەيتىلگەن تاركىلەۋ" ينستيتۋتى ەلىمىز ءۇشىن وتە ماڭىزدى. مۇنداي كولەمدە ۇرلىق الەمنىڭ ەشبىر ەلىندە بولماعان. سوندىقتان مەن باس پروكۋرور بەرىك اسىلوۆقا قولداۋ ءبىلدىرىپ، حات جولدادىم"، – دەپ اتاپ ءوتتى دەپۋتات.

مارات باشيموۆتىڭ ايتۋىنشا، الەمنىڭ كوپتەگەن ەلدەرىندە فاتف ۇسىنىمدارى زاڭناماعا ەنگىزىلگەن، الايدا قازاقستاندا بۇل پروسەستى "بارلىق دەڭگەيدەگى لوببيستەر، سونىڭ ىشىندە وليگارحتار" تەجەپ وتىر.

"قازىرگى ۋاقىتتا بۇل نورما جوق، سوندىقتان مۇلىك ءۇشىنشى تۇلعالارعا اۋىسىپ قويعاندىقتان، جاۋاپكەرشىلىكتەن جالتارعاندار كوبەيدى، ال ولاردىڭ مۇلىكتەرى تولىق تاركىلەنبەيدى. سوتتالعان ادامدار وزدەرىنە جازىپ بەرگەن اكتيۆتەر مەن مۇلىككە الاڭسىز قارايدى، ويتكەنى ولار بۇل مۇلىك پەن اقشانىڭ ەشقاشان تاركىلەنبەيتىنىن بىلەدى. الايدا، "كەڭەيتىلگەن تاركىلەۋ" ەنگىزىلگەن جاعدايدا بۇل اكتيۆتەر تاركىلەنەتىن بولادى"، – دەپ ءتۇسىندىردى دەپۋتات.

"كەڭەيتىلگەن تاركىلەۋ" تەك سول ادامنىڭ مۇلىكتى زاڭدى جولمەن العانىن دالەلدەي الماعان جاعدايدا جۇزەگە اسىرىلۋى مۇمكىن. جاڭا ۇسىنىس بويىنشا، تەرگەۋ باستالعان ادام ءوزىنىڭ مۇلىكتى زاڭدى جولمەن قالاي يەلەنگەنىن دالەلدەۋى ءتيىس. ەگەر بۇل دالەلدەنبەسە، وندا ونىڭ مۇلكى تاركىلەنەدى.