شىمكەنت قالاسى بويىنشا قارجىلىق مونيتورينگ اگەنتتىگىنىڭ دەپارتامەنتى م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە اسا ءىرى كولەمدە بيۋدجەت قاراجاتىن جىمقىرۋ جانە زاڭسىز جولمەن الىنعان مۇلىكتى زاڭداستىرۋ فاكتىسى بويىنشا تەرگەۋدى اياقتادى.

كۇدىكتىلەر قاتارىندا ۋنيۆەرسيتەت رەكتورىنىڭ مىندەتىن اتقارۋشى، قارجى جانە اكىمشىلىك دەپارتامەنتتەردىڭ ديرەكتورلارى، سونداي-اق سەرىكتەس ۇيىمداردىڭ باسشىلارى بار.

تەرگەۋ بارىسىندا ۋنيۆەرسيتەت پەن مەردىگەر ۇيىمدار اراسىندا جالپى سوماسى 256 ميلليون تەڭگەگە جالعان كەلىسىمشارتتار جاسالعانى انىقتالدى. قۇرىلىس-مونتاج جۇمىستارى، قىزمەت كورسەتۋ جانە تاۋار جەتكىزۋ ءىس جۇزىندە ورىندالماعان. بولىنگەن بيۋدجەت قاراجاتى جالعان اكتىلەر ارقىلى اففيليرلەنگەن كومپانيالار شوتتارىنا اۋدارىلىپ، كەيىن قولما-قول اقشاعا اينالدىرىلعان.

زاڭسىز تابىسقا كۇدىكتىلەر التى قىمبات كولىك (Mercedes-Benz S-كلاسس، Lexus LX570 جانە باسقا دا ماركالار) پەن شىمكەنت قالاسىنىڭ ورتالىعىنان قۇنى 254 ميلليون تەڭگە بولاتىن ەليتالىق كوتتەدج ساتىپ العان. بۇل مۇلىككە سوت شەشىمىمەن تىيىم سالىندى.

قازىرگى تاڭدا ءتورت كۇدىكتىگە قاتىستى ءۇيقاماق تۇرىندەگى بۇلتارتپاۋ شاراسى قولدانىلىپ، قىلمىستىق ءىس سوتقا جولداندى.