الماتىدا 18 جاستاعى بويجەتكەننىڭ ولىمىنە قاتىستى تەرگەۋ جالعاسۋدا: اناسى ادىلدىك تالاپ ەتۋدە

وتكەن جىلدىڭ شىلدە ايىندا الماتىداعى كوپقاباتتى تۇرعىن ۇيلەردىڭ بىرىندە قايعىلى وقيعا تىركەلدى — 18 جاستاعى اقنار گۇلستان 7-قاباتتان قۇلاپ، وقيعا ورنىندا كوز جۇمدى. بۇل جايت قوعامدا ۇلكەن رەزونانس تۋدىردى. مارقۇمنىڭ اناسى رەسمي نۇسقامەن كەلىسپەيتىنىن ايتىپ، قىزىنىڭ ولىمىنە بوگدە بىرەۋدىڭ قاتىسى بار دەپ ەسەپتەيدى. ونىڭ سوزىنشە، اقنار ءوزىن-وزى ولتىرەتىن قىز ەمەس.

وسىعان بايلانىستى الماتى قالالىق پوليسيا دەپارتامەنتى رەسمي مالىمدەمە جاسادى:

«مارقۇمنىڭ تۋىستارىنىڭ قايعىسىنا شىن جۇرەكتەن ورتاقتاسامىز. تەرگەۋ جالعاسۋدا. سوڭعى پروسەسسۋالدىق شەشىم بارلىق قاجەتتى ساراپتامالار مەن تەرگەۋ ارەكەتتەرى اياقتالعاننان كەيىن قابىلداناتىن بولادى»، – دەلىنگەن حابارلامادا.

وقيعا المالى اۋدانى اۋماعىندا تىركەلىپ، اتالعان فاكتى بويىنشا ق ر قىلمىستىق كودەكسىنىڭ 105-بابى – "ءوزىن-وزى ولتىرۋگە يتەرمەلەۋ" بويىنشا قىلمىستىق ءىس قوزعالعان. قازىرگى تاڭدا ءتيىستى ساراپتامالار جۇرگىزىلىپ، تەرگەۋ امالدارى جالعاسىپ جاتىر.

الايدا تەرگەۋ مۇددەسىنە بايلانىستى وزگە مالىمەتتەر جاريا ەتىلمەگەن. اقناردىڭ تۋىستارى بۇل ءىستىڭ ءادىل تەرگەلۋىن تالاپ ەتىپ، كىنالى تۇلعالار جاۋاپقا تارتىلادى دەگەن ۇمىتتە. ولار قوعامنان دا قولداۋ سۇراپ، بۇل وقيعاعا بەيجاي قاراماۋعا شاقىرۋدا.

«اقنار — ومىرگە قۇشتار، الدا كوپتەگەن ارمانى مەن ماقساتى بار قىز ەدى. ونىڭ وزىنە قول جۇمساۋى مۇمكىن ەمەس. بۇل — ادىلەتسىز تۇجىرىم. بۇل ءولىمنىڭ جاي عانا كەزدەيسوقتىق ەمەس ەكەنىنە سەنىمدىمىن»، – دەيدى مارقۇمنىڭ اناسى.

تەرگەۋ ناتيجەلەرى مەن جاڭا مالىمەتتەر جاريا بولعان جاعدايدا، بۇل ءىس قوعام نازارىندا قالا بەرمەك.