الماتى. قازاقپارات - بۇگىن الماتىدا «عىلىم ورداسى» رمك كەشەنىندە «ورتالىق ازياداعى تاريحناما جانە دەرەكتەر: وتكەنى، بۇگىنى جانە بولاشاعى تۋرالى جاڭا زەرتتەۋلەر» اتتى حالىقارالىق سەمينار-پراكتيكۋم بارىسىندا بەلگىلى شىعىستانۋشى، قازاقستاندا قىتايتانۋ عىلىمىنىڭ نەگىزىن قالاۋشىلاردىڭ ءبىرى، تاريح عىلىمدارىنىڭ دوكتورى كلارا حافيزوۆانىڭ ورىس تىلىندە  شىققان «ديالوگ سيۆيليزاسيي نا ششەلكوۆوم پۋتي» جانە «ۆوستوچنايا ديپلوماتيا نا ستىكە سيۆيليزاسيي» اتتى ەكى كىتابىنىڭ تانىستىرىلىمى بولدى.
«باتىس وركەنيەتى تاراپىنان كوشپەلىلەردى جابايى، باسقىنشى رەتىندە بەرىلگەن تۇسىنىكتەن ارىلاتىن كەز كەلدى. مەن ءبىر كىتابىمدا ورتالىق ازيا حالىقتارىنىڭ ەلشىلىكتەرى جونىندە كەستە جاسادىم. ودان اسكەري قاقتىعىستار مەن جاۋلاپ الۋشىلىقتان كورى، ەلشىلىك بايلانىستاردىڭ ەداۋىر كوپ بولعانىن كورۋگە بولادى. ويتكەنى، ۇلان-عايىر دالانى مەكەندەگەن كوشپەلىلەر قاي كەزەڭدە بولماسىن بەيبىت جاعدايدا ءومىر سۇرۋگە، ءوزارا ساۋدا-ساتتىق جاساۋعا ۇمتىلعان. بۇل جەردە ۇلى جىبەك جولىنىڭ ورنى ەرەكشە. ونىڭ سيمۆولى دا قۇربانى دا - جىلقى. بۇكىل وركەنيەتتەر بايلانىسى جىلقىنىڭ ارقاسىندا جۇزەگە استى. جۇڭگو جىبەكتى جىلقىعا ايىباستاۋ ءۇشىن باتىس ايماقپەن ساۋدا-ساتتىق ورناتتى. ۇلى جىبەك جولى وسىدان باستاۋ الادى. ول كونە زاماندا جىلقى جولى اتانعان»، - دەدى كلارا حافيزوۆا.

سونىمەن قاتار، بۇگىنگى القالى جيىندا قازاق كسر-نىڭ 1969 جىلى الماتىدا جارىق كورگەن «XV-XVIII عاسىرلارداعى قازاق حاندىعىنىڭ تاريحى تۋرالى ماتەريالدار (پارسى جانە تۇرىك شىعارمالارىنا الىنعان دەرەكتەر)» جيناعىنىڭ تولىقتىرىلىپ قايتا باسىلىپ شىعارىلعان نۇسقاسىنىڭ تۇساۋكەسەرى ءوتتى.

ۇسىنىلعان جيناقتىڭ دەرەكتىك نەگىزىن XV-XVIII  عاسىرلارداعى تاريحتى زەرتتەۋ اياسىنداعى پارسى جانە تۇركى تىلىنەن اۋدارىلعان شىعارمالار قۇرايدى.

كىتاپتى استاناداعى حالىقارالىق تۇركى اكادەمياسى مەن الماتىداعى ش. ءۋاليحانوۆ اتىنداعى تاريح جانە ەتنوگرافيا ينستيتۋتى بىرلەسىپ ازىرلەگەن.

دەرەككوز: قازاقپارات