پرەمەر-مينيستردىڭ ورىنباسارى، ۇلتتىق ەكونوميكا ءمينيسترى سەرىك جۇمانعارين شەگىرتكە تاقىرىبىنا بايلانىستى جۋرناليستەردىڭ بىرىمەن ءسوز تالاستىرىپ قالدى. وقيعا ۇكىمەت كۋلۋارىندا بولعان.
جۋرناليستەر مينيستردەن 2023 جىلعى شەگىرتكە قاپتاعان كەزەڭدە ايتقان پىكىرىن ناقتىلاۋدى سۇرادى. سول كەزدە جۇمانعارين كەيبىر ەلدەردە شەگىرتكە تاعام رەتىندە پايدالانىلاتىنىن ايتىپ، ونى «حالال ءونىم» دەپ اتاعان بولاتىن.
جۋرناليستەردىڭ ءبىرى:
– قازاقستاندا شەگىرتكەدەن چيپسى قاشان شىعارىلادى؟ – دەپ سۇراعاندا، بىرنەشە مينۋتقا سوزىلعان پىكىر الماسۋ باستالدى.
سەرىك جۇمانعارين بۇل پىكىرىن بۇرمالاپ جەتكىزگەندەرگە نارازىلىعىن ءبىلدىرىپ، بىلاي دەدى:
– مەن ەشقاشان شەگىرتكەدەن چيپسى جاسايىق دەپ ايتقان جوقپىن. جانە ونى جەۋ كەرەك دەپ ۇگىتتەمەدىم. نەنى ويدان شىعارىپ وتىرسىزدار؟ مەن تەك شەگىرتكەنىڭ كەيبىر ەلدەردە تاعام رەتىندە قولدانىلاتىنىن جانە حالال ءونىم ەكەنىن ايتتىم. بۇل جايىندا قازاقستان مۇسىلماندارى ءدىني باسقارماسى دا مالىمدەگەن. ءبىراق ونى جەۋ كەرەك دەپ ايتقانىم جوق. جەيمىن دەسەڭدەر – ءوز ەرىكتەرىڭ.
ايتا كەتەيىك، بىلتىر ماۋسىم ايىندا ءماجىلىس كۋلۋارىندا بەرگەن سۇحباتىندا جۇمانعارين شەگىرتكەمەن كۇرەس تاقىرىبىندا پىكىر ءبىلدىرىپ، «شەگىرتكە – حالال ءونىم» دەگەن بولاتىن. بۇل مالىمدەمە سول كەزدە الەۋمەتتىك جەلىدە قىزۋ تالقى تۋدىرعان ەدى.
