شەرزات پولاتتىڭ ولىمىنە بايلانىستى ءوتىپ جاتقان اتىشۋلى قىلمىستىق ءىس بويىنشا سوت وتىرىسىندا سوتتالۋشى شىڭعىس بەلعوجايەۆ ءجارىسسوز كەزەڭىندە ءوز ۇستانىمىن اشىق ءبىلدىرىپ، قارجاۋباي نۇرىموۆتى جاۋاپقا تارتۋدى سۇرادى. ول قايعىلى وقيعا جايلى وي تولعاي كەلە، ءومىر مەن ءولىم جايلى فيلوسوفيالىق پىكىرىن دە جاسىرمادى.

– بۇل ومىردە ەشكىم ماڭگى ەمەس. بارلىعىمىزدىڭ باراتىن جەرىمىز – ءبىر. اجالى كەلگەن ادام ەرتە مە، كەش پە – ءبارىبىر، ءدال ۋاقىتىندا دۇنيەدەن وتەدى. وسى قايعىلى وقيعاعا ءبىز سەبەپكەر بولىپ وتىرمىز، – دەدى ول.

سوتتالۋشى ءوز سوزىندە بۇل ىسكە قاتىسى بار ادامداردىڭ بارلىعى بىردەي جاۋاپكەرشىلىككە تارتىلماعانىن مەڭزەدى. ونىڭ ايتۋىنشا، كەيبىر تۇلعالار بۇل پروسەسكە نەگىزسىز تارتىلىپ وتىرسا، كەيبىرەۋلەر مۇلدە ەسكەرۋسىز قالعان.

– دۋمان ىسقاق بۇگىن ورتامىزدا سەبەپسىز وتىر. ال دارحان اسكەنتايدى مەن مۇلدە تانىماي كەتتىم. قارجاۋباي نۇرىموۆ بۇل ىستە جاۋاپ بەرۋى ءتيىس دەپ ەسەپتەيمىن، – دەدى بەلعوجايەۆ سوت الدىندا.

سونىمەن قاتار سوت وتىرىسىندا جابىرلەنۋشى تاراپ تالاپ ەتىپ وتىرعان 660 ميلليون تەڭگە كولەمىندەگى مورالدىق وتەماقى تۋرالى دا پىكىر ايتىلدى. بەلعوجايەۆ بۇل سومانى تىم اسىرا سىلتەگەن تالاپ دەپ باعالادى.

– بۇل سومانى وسى وتىرعان 9 ادام ءومىر بويى جۇمىس ىستەسە دە وتەي المايدى. سوندىقتان وتەماقى تالابىن قاناعاتتاندىرماۋدى سۇرايمىن، – دەدى ول.

ايىپتاۋلار جانە ءىس ءمان-جايى

بەلعوجايەۆ پەن وزگە دە ايىپتالۋشىلارعا قازاقستان رەسپۋبليكاسىنىڭ قىلمىستىق كودەكسىنىڭ بىرنەشە باپتارى بويىنشا ايىپ تاعىلعان. ولاردىڭ قاتارىندا:

• 99-باپ – كىسى ءولتىرۋ،

• 188-باپ – ۇرلىق،

• 293-باپ – بۇزاقىلىق،

• 434-باپ – قىلمىستى جاسىرۋ.

سوت-مەديسينالىق ساراپتاما قورىتىندىسى بويىنشا، شەرزات پولات پىشاق جاراقاتى سالدارىنان قان جوعالتىپ، وقيعا ورنىندا كوز جۇمعان. بۇل جاعداي قوعامدا كەڭ رەزونانس تۋدىرىپ، كوپشىلىكتىڭ نازارىن اۋدارعان ەدى.

ءىس بويىنشا ۇكىم ءالى شىقپاعان، سوت پروسەسى جالعاسىپ جاتىر.