ەلىمىزدە حالىقارالىق ەڭبەك ۇيىمىنىڭ جوبالىق كەڭسەسى جۇمىسىن باستادى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتتى.

ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەلىمىزدە ەڭبەك قاۋىپسىزدىگى سالاسىنداعى مامانداردى دايارلاۋعا باعىتتالعان وقۋ ورتالىعى اشىلاتىنىن حابارلادى.

ونىڭ ايتۋىنشا، وتكەن جىلى قازاقستانعا العاش رەت حالىقارالىق ەڭبەك ۇيىمىنىڭ (حەۇ) باس ديرەكتورى رەسمي ساپارمەن كەلگەن. وسى ساپاردىڭ ناتيجەسىندە بيىل ەلىمىزدە حەۇ-نىڭ جوبالىق كەڭسەسى اشىلىپ، جۇمىسىن باستادى.

— قازىرگى تاڭدا ءبىز ەڭبەك رەسۋرستارىن دامىتۋ ورتالىعى بازاسىندا حالىقارالىق ەڭبەك ۇيىمىنىڭ تۋريندەگى وقۋ ورتالىعىنىڭ فيليالىن اشۋ باعىتىندا بەلسەندى جۇمىس جۇرگىزىپ جاتىرمىز، — دەدى مينيستر.

جاڭا ورتالىق كەلەسى ماڭىزدى مىندەتتەردى اتقارۋعا مۇمكىندىك بەرەدى:

• شەتەلگە شىقپاي-اق ەڭبەك قاۋىپسىزدىگى ماماندارىن ساپالى ءارى جۇيەلى تۇردە دايارلاۋ؛

• حالىقارالىق ۇزدىك تاجىريبە نەگىزىندە ۇلتتىق كادرلاردىڭ بىلىكتىلىگىن ارتتىرۋ؛

• مەملەكەتتىك ورگاندار، الەۋمەتتىك ارىپتەستەر مەن حالىقارالىق ۇيىمدار اراسىنداعى ىنتىماقتاستىقتى نىعايتۋ؛

• قازاقستاننىڭ ورتالىق ازياداعى ەڭبەك قاۋىپسىزدىگى سالاسىنداعى ايماقتىق قۇزىرەتتىلىك ورتالىعى رەتىندەگى ءرولىن كۇشەيتۋ.

بۇل باستاما ەلدەگى ەڭبەك قاۋىپسىزدىگىن جاقسارتۋعا جانە حالىقارالىق ستاندارتتارعا ساي كادرلار دايىنداۋعا سەرپىن بەرەدى.