قازاقستاننىڭ قاتار مەملەكەتىندەگى ەلشىلىگى سول ەلدە ۋاقىتشا جۇرگەن ازاماتتارعا رەسمي تۇردە ۇندەۋ جاريالادى. قازىرگى احۋالعا بايلانىستى جاسالعان مالىمدەمەدە، قاتار اۋماعىندا بەيبىت تۇرعىندارعا تىكەلەي ءقاۋىپ ءتونىپ تۇرماعانى اتاپ وتىلگەن.

«ازاماتتاردان سابىر ساقتاپ، تىنىش ءارى ءقاۋىپسىز جەرلەردە بولۋدى، سونداي-اق قاۋىپسىزدىك تالاپتارىن قاتاڭ ۇستانۋدى سۇرايمىز»، – دەپ حابارلادى ديپلوماتيالىق وكىلدىك.

سونداي-اق ەلشىلىك قاتاردا اۋە قاتىناسىنىڭ ۋاقىتشا توقتاتىلعانىن ەسكە سالدى. اۋە كەڭىستىگى اشىلعاننان كەيىن، تۋريستەردىڭ ەلگە ورالۋى بويىنشا ناقتى مالىمەتتەر وتاندىق تۋروپەراتورلار ارقىلى بەرىلەتىن بولادى. قازىرگى تاڭدا وسى باعىتتا ۇيىمداستىرۋ شارالارى اتقارىلۋدا.

قازاقستان ديپلوماتتارى جاعدايدى تۇراقتى باقىلاۋدا ۇستاپ وتىر. قاجەت بولعان جاعدايدا قاتار جانە قازاقستان تاراپىنان جاۋاپتى ورگاندارمەن بىرلەسىپ، ازاماتتاردىڭ قاۋىپسىزدىگىن قامتاماسىز ەتۋگە باعىتتالعان قوسىمشا ارەكەتتەر قولعا الىناتىنى ايتىلدى.

«جاعداي تۇراقتالعانشا ۇيدەن شىقپاي، بارىنشا ءقاۋىپسىز جەرلەردە بولۋلارىڭىزدى وتىنەمىز»، – دەلىنگەن ەلشىلىك تاراتقان حابارلامادا.

سونىمەن قاتار توتەنشە جاعداي كەزىندە حابارلاسۋعا ارنالعان بايلانىس نومىرلەرى دە جاريالاندى:

📞 +974 4411 0527
📞 +974 4412 8015
📞 +974 5064 9955

ايتا كەتسەك، 23 ماۋسىم كۇنى يران اقش-تىڭ قاتار مەن يراك اۋماعىنداعى ءبىرقاتار اسكەري نىساندارىنا سوققى جاساعان بولاتىن. وسىدان كەيىن قاتار بيلىگى تەگەراننىڭ ارەكەتىن ايىپتايتىنىن رەسمي تۇردە مالىمدەدى.