ۋكراينداعى سوعىسقا قاتىسقان اتىراۋلىق تۇرعىن 5 جىلعا سوتتالدى. بۇل تۋرالى اتىراۋ وبلىستىق سوتى حابارلادى. وعان ق ر قىلمىستىق كودەكسىنىڭ 172-بابى («شەت مەملەكەت اۋماعىنداعى قارۋلى قاقتىعىستارعا قاتىسۋ») بويىنشا ايىپ تاعىلدى. ۇكىم ءالى زاڭدى كۇشىنە ەنبەگەن.

وبلىستىق سوتتىڭ حابارلاۋىنشا، سوتتالۋشى س. بىلتىر ناۋرىز سوڭىندا ماسكەۋگە بارىپ، رەسەيدىڭ ۋاكىلەتتى ورگاندارىمەن كەلىسىمشارت جاساسقان.

"قىسقا مەرزىمدى وقۋدان جانە كيىم-كەشەك العاننان كەيىن، تانك پولكىنىڭ قۇرامىندا اسكەري دارىگەر رەتىندە دونەسك وبلىسىندا قارۋلى قاقتىعىستارعا زاڭسىز قاتىسقان. 2024 جىلدىڭ جەلتوقسانىندا قارۋلى قاقتىعىس بارىسىندا جارىلعىش قۇرىلعى جارىلىپ، سىنىق جاراقاتىن الىپ، اسكەري گوسپيتالگە جاتقىزىلعان" دەپ حابارلادى سوت.

پروسەسس كەزىندە ول تاعىلعان ايىپتاردى تولىق مويىنداپ، وكىنەتىنىن ايتىپ، تۇرمەدەن باسقا جازا تاعايىنداۋدى سۇراعان. ال پروكۋرور وعان 6 جىل تۇرمە سۇراعان. سوت ۇكىم شىعارار كەزدە ونىڭ اسىراۋىندا جاس بالالار بارىن دا ەسكەرگەن.