شىمكەنت اكىمدىگىنىڭ عيماراتىنان ءورت شىقتى، دەپ حابارلايدى قالالىق توتەنشە جاعدايلار دەپارتامەنتى. 14 تامىز ساعات 03.19-دا "112" قىزمەتىنە شاقىرتۋ تۇسكەن.
"ءال-فارابي اۋدانى تاۋكە حان داڭعىلى №3 مەكەنجايىندا ورنالاسقان اكىمشىلىك عيماراتىنان ءورت شىققان. ءتىلسىز جاۋ جالپى كولەمى 1200 شارشى مەتر اۋماققا جايىلعان. عيماراتتىڭ شاتىرى جانعان"، - دەيدى ۆەدومستۆو.
ءورت ساعات 04.58-دە وقشاۋلانىپ، ساعات 05.27-دە تولىعىمەن ءسوندىرىلدى. ورتتە زارداپ شەككەندەر مەن قازا بولعاندار جوق. ءورتتىڭ سەبەبى انىقتالۋدا.
"ءورتتى سوندىرۋگە شىمكەنت قالاسى تجد 21 بىرلىك تەحنيكا جانە جەكە قۇرامنان 88 ادام، تجم اپاتتار مەديسيناسى ورتالىعىنان 1 تەحنيكا، 3 ادام، جەرگىلىكتى اتقارۋشى ورگاننان 2 تەحنيكا، 2 ادام جۇمىلدىرىلدى"، - دەيدى دەپارتامەنت.
