اقش پرەزيدەنتى دونالد ترامپ پەن رف پرەزيدەنتى ۆلاديمير پۋتين ەرتەڭ انكوريدجە شتاتىندا سامميت وتكىزبەك. باستى تاقىرىپ – رەسەي مەن ۋكراينا اراسىنداعى سوعىستى توقتاتۋ، بەيبىت كەلىسىمنىڭ العىشارتتارىن تالقىلاۋ. ترامپ سامميتتەن بۇرىن ۋكراينا پرەزيدەنتى زەلەنسكييمەن جانە ەو مەملەكەتتەرى باسشىلارىمەن تەلەفون ارقىلى سويلەسىپ، الدىنان ءوتتى.
ءبىرقاتار باسىلىمدار ترامپتىڭ «رەسەي مەن ۋكراينا تەرريتوريا الماسۋى مۇمكىن» دەگەن بولجامدارىن تاراتتى. قازاقستان رەسپۋبليكاسى پرەزيدەنتى دە زەلەنسكييمەن تەلەفون ارقىلى سويلەسىپ، «جانجالدان، جامان بولسا دا ءبىتىم ارتىق» دەگەن مازمۇنداعى پىكىر بىلدىرگەن ەدى. ترامپپەن كەزدەسۋ ناقتىلاناردان بۇرىن پۋتين ءۇندىستان پرەمەرىنە، قحر ءتوراعاسىنا، قازاقستان جانە وزبەكستان ليدەرلەرىنە تەلەفون شالعان ەدى.
رەسەيلىك باسىلىمدار دا كەزدەسۋ الدىندا اقپارات الاڭىنىڭ كورىگىن قىزدىرىپ جاتىر. «ترامپ پەن پۋتين، ەڭ الدىمەن، اقش-تىڭ رەسەيگە قارسى ەكونوميكالىق سانكسيالارىن جەڭىلدەتۋ ماسەلەسىن تالقىلايدى» دەگەن ريتوريكا جەتەكشى باسىلىم بەتتەرىندە ءورىپ ءجۇر. ءتىپتى، رەسەي عىلىم اكادەمياسى قاۋىپسىزدىك ماسەلەلەرىن زەرتتەۋ ورتالىعىنىڭ ديرەكتورى كونستانتين بلوحين «اقش ءوز سانكسيالارىنان ءوزى زارداپ شەگىپ وتىر» دەپ رەسمي مالىمدەپ ۇلگەردى.
ۋكراينا تەرريتوريا تالقىلاۋعا بارمايتىنىن جانە ەڭ سوڭعى ءسوز رەسەي مەن ۋكراينا اراسىنداعى كەلىسسوزدەر كەزىندە ايتىلاتىنىن جەتكىزدى. فرانسيا پرەزيدەنتى ماكرون دا ترامپپەن تەلەفون ارقىلى تىلدەسىپ، ەۋروپالىقتاردىڭ ۇستانىمى مەن ۋكراينا پوزيسياسى ءبىرىنشى كەزەكتە بولاتىنى تۋرالى ۋادە العانىن جاريالادى.
ەۋروپالىقتار دا، رەسەيلىكتەر دە، ءتىپتى، امەريكالىقتاردىڭ ءوزى اتالعان كەزدەسۋگە بارىنشا ىقپال ەتۋگە تىرىسادى. الەم نازارىن تىككەن كەزدەسۋ بەيبىتشىلىككە باستاسىن دەپ تىلەيمىز.
