ورال. قازاقپارات - بۇگىن ورال قالاسىنداعى سالتانات سارايىندا «پارىز» پىكىرتالاس كلۋبىنىڭ كوشپەلى وتىرىسى بولىپ، وندا «ماڭگىلىك ەل - اسىل مۇراتىمىز» دەگەن تاقىرىپتا ۇلت زيالىلارىنىڭ قازاقستانداعى تۇراقتىلىقتى ساقتاۋ، ەل بىرلىگىن ورنىقتىرۋ باعىتىنداعى ۇسىنىس-پىكىرلەرى ورتاعا سالدى.
قوعام قايراتكەرى، ساياساتتانۋشى، اتالمىش كلۋب جەتەكشىسىنىڭ ورىنباسارى دوس كوشىمنىڭ ايتۋىنشا، بيىلعى قىركۇيەكتە مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرىسىمەن الماتى قالاسىندا ۇلت زيالىلارىنان قۇرالعان «پارىز» پىكىرتالاس كلۋبى ءوز جۇمىسىن باستادى. مۇنداعى ماقسات - ۇلت زيالىلارىن ساياسي-يدەولوگيالىق ماسەلەلەرگە تارتۋ، ولاردىڭ «100 ناقتى قادام» ۇلت جوسپارى مەن «ماڭگىلىك ەلگە» قاتىستى وي-تولعامدارىن ءبىلۋ، سونىڭ ناتيجەسىندە ناقتى باستامالار كوتەرۋ. زيالىلار كوبىنە رۋحاني-مادەني جاعىنان كورىنەدى دە، ساياسي ماسەلەگە كەلگەندە، باسەڭسىپ قالادى، كەيدە ءتىپتى قاشقاقتاپ جۇرەدى. شىن مانىسىندە زيالىنىڭ اتى زيالى. ولاردىڭ بىلىم-بىلىگى، تاجىريبەسى مول. سايىپ كەلگەندە، زيالى مەملەكەت پەن بيلىك اراسىنداعى كوپىر بولا الادى. سەبەبى قازاق تۇبىندە زيالىلارىن تىڭدايدى. ولار مەملەكەتتىك قىزمەتكەر ەمەس، سوندىقتان ءوز پىكىرىن اشىق ايتا الادى. ولاردىڭ ساياسي دەڭگەيى مەن بەلسەندىلىگى جوعارى بولسا، بۇل مەملەكەت ءۇشىن دە پايدالى. «پارىز» پىكىرتالاس كلۋبى وسىعان دەيىن بىرنەشە وبلىستا كەزدەسۋلەرىن وتكىزدى، قوزعاعان تاقىرىبى دا ءار الۋان  بولدى. مىسالى، پەتروپاۆلدا بىرتەكتىلىك ماسەلەسى تالقىعا سالىندى. ياعني قازاق حالقىنىڭ ءبىر بولۋىنىڭ نەگىزى نەدە، بىرتەكتىلىك كەرەك پە؟ دەگەن ساۋالدارعا  جاۋاپ ىزدەلدى. ءتىپتى بىرتەكتىلىك دۇرىس ەمەس دەگەن سىندار دا ايتىلدى. سول سەكىلدى قىزىلوردادا ۇلت جانە مەملەكەتتىك ۇلت ماسەلەسى توڭىرەگىندە ءسوز قوزعالدى. ورالداعى باسقوسۋ دا - ورتاق ماقساتتان تۋىنداپ وتىرعان اڭگىمەلەردىڭ زاڭدى جالعاسى. ەڭ باستىسى، قۇندى پىكىرلەر جەردە قالماي، جيناقتالىپ، ءتيىستى ناتيجە شىعاتىن بولادى.

جيىندا سونداي-اق فيلوسوف، پۋبليسيست، كلۋب وتىرىسىنىڭ حاتشىسى ءابدىراشيد باكىر ۇلى قازىرگى تاڭدا يدەولوگيالىق ماسەلەلەردىڭ بۇرىنعىدان دا وتكىرلەنە تۇسكەنىن، سوندىقتان ولاردى بىرىگىپ شەشۋدىڭ ماڭىزدىلىعىن اتاپ كورسەتتى.

اقىندار، قازاقستان جازۋشىلار وداعىنىڭ مۇشەلەرى اقۇشتاپ باقتىگەرەيەۆا، ايسۇلۋ قادىربايەۆا، عايساعالي سەيتاق، عالىمدار ولەگ يۋروۆ، ابات قىدىرشايەۆ، جاڭابەك جاقسىعالييەۆ، ۆلاديمير سالوۆ جانە باسقالار ەلدىڭ بىرلىگى مەن بولاشاعىن نىقتاۋ ءۇشىن الدىمەن ونىڭ يدەولوگياسىن جوندەپ الۋ، ۇلتتىق مەملەكەت قالىپتاستىرۋ، الاۋىزدىقتان اۋلاق بولىپ، قازاق حالقىنىڭ مۇددەسى ءۇشىن بىرىگۋ، مەملەكەتتىك ءتىلدىڭ ماڭىزىن ارتتىرۋ تۋرالى ويلارىمەن ءبولىستى.

دەرەككوز: قازاقپارات