كوكشەتاۋ. قازاقپارات - ورازاق اۋىلىندا پايدالانۋعا بەرىلگەن ۇيلەردىڭ سانى 46 جەتىپ، ازىرگە بارلىعى 92 وتباسى پاتەرلەر يەلەندى. بۇل تۋرالى بۇگىن وبلىس اكىمى سەرگەي كۋلاگيننىڭ وڭىرگە ساپارى بارىسىندا بەلگىلى بولدى.
بۇل وسى اۋىلدا تابيعات اپاتىنان باسپاناسىز قالعاندارعا سالىنىپ جاتقان ەكى پاتەرلى 100 ءۇيدىڭ جارتىسىنا جۋىعى. قازىرگى كەزدە قالعان ۇيلەردىڭ قۇرىلىسى قىزۋ جۇرگىزىلۋدە. 

سونىمەن قاتار تاسقىن سۋدان زارداپ شەككەن تۇرعىندار ءۇشىن اقمول جانە قوسشى اۋىلدارىندا دا ەكى-ەكىدەن 45 پاتەرلى تۇرعىن ءۇيدىڭ قۇرىلىسى جۇرگىزىلىپ جاتىر.

اۋدانعا جۇمىس ساپارىمەن بارعان وبلىس اكىمى سەرگەي كۋلاگين اتالعان ۇيلەردىڭ قۇرىلىسىنا نازار اۋدارىپ، جۇمىستا شيراتۋدى تاپسىردى.

«كۇن سۋىتىپ بارادى. سوندىقتان ۋاقىت تىعىز، جۇمىستى شيراتۋىمىز كەرەك. بۇعان تۇرعىندار دا قاراپ وتىرماي قولعابىس جاساعانى ابزال. قوسىمشا جۇمىس كۇشى رەتىندە 50 كۋرسانتتى تارتىپ وتىرمىز. ازىرگە 46 ءۇيدى پايدالانۋعا بەردىك. بۇل 92 وتباسى پاتەرلى بولدى دەگەن ءسوز. ال قالعان ۇيلەر قاراشانىڭ 15-ىنە دەيىن تولىق بەرىلۋى كەرەك»، - دەپ اتاپ ءوتتى وبلىس اكىمى.

ەسكە سالا كەتسەك، بيىلعى جىلعى كوكتەمگى سۋ تاسقىنىنان اقمولا وبلىسىنداعى ءبىرقاتار ەلدى مەكەندى سۋ شايىپ كەتىپ، حالىقتى ءبىراز ابىگەرگە سالعانى بەلگىلى. سونىڭ ىشىندە سەلينوگراد اۋدانى ەڭ كوپ زارداپ شەكتى. اۋدان بويىنشا بارلىعى 300-گە جۋىق باسپانا جارامسىز بولىپ قالسا، ونىڭ 200ء-ى - ورازاق اۋىلىنداعى ۇيلەر. اعىمداعى جىلدىڭ 15 قىركۇيەك كۇنى تاسقىن سۋدان ەڭ كوپ زارداپ شەككەن ورازاق اۋىلىندا 20 ءۇي پايدالانۋعا بەرىلىپ، 40 وتباسى پاتەرلى بولعان ەدى.  

دەرەككوز: قازاقپارات