2025 جىلعى 2 قىركۇيەكتە اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە جاڭا وقۋ جىلىنىڭ باستالۋىنا وراي ءداستۇرلى «ءبىلىم كۇنى» مەرەكەسىنە ارنالعان سالتاناتتى ءىس-شارا ءوتتى.

جيىندى ۋنيۆەرسيتەتتىڭ باسقارما ءتوراعاسى – رەكتور بولات تىلەپ اشىپ، ستۋدەنتتەر مەن وقىتۋشىلار قۇرامىن قۇتتىقتادى. ول ءبىلىم الۋشىلارعا ساتتىلىك تىلەپ، ەلىمىزدىڭ بولاشاعى جاستارعا سەنىم ءبىلدىردى. شاراعا ۋنيۆەرسيتەت ارداگەرلەرى دە قاتىسىپ، جۇرەكجاردى تىلەكتەرىن جەتكىزدى. ارداگەرلەر كەڭەسىنىڭ ءتوراعاسى بەرىكجان ايتقۇل ۇلى ءبىرىنشى كۋرس ستۋدەنتتەرىنە اق باتاسىن بەردى.

ءىس-شارا اياسىندا الماتى قالاسى مەدەۋ اۋدانى اكىمدىگىنىڭ باستاماسىمەن جۇزەگە اسىپ كەلە جاتقان «مەكتەپكە جول» رەسپۋبليكالىق اكسياسى جالعاسىن تاپتى. ۋنيۆەرسيتەت رەكتورى بولات تىلەپتىڭ ۇسىنىسىمەن جانە كاسىپوداق ۇيىمىنىڭ قولداۋىمەن اۋدان مەكتەپتەرىنىڭ وقۋشىلارىنا وقۋ قۇرال-جابدىقتارى تابىستالدى. سالتاناتتى جيىن ستۋدەنتتەردىڭ شىعارماشىلىق كونسەرتىمەن جالعاسىپ، قوناقتارعا كوتەرىڭكى كوڭىل-كۇي سىيلادى.

ءدال وسى كۇنى ۋنيۆەرسيتەتتىڭ پەداگوگيكا جانە پسيحولوگيا فاكۋلتەتىندە ۇلت ۇستازى احمەت بايتۇرسىن ۇلى اتىنداعى ءدارىسحانانىڭ رەسمي اشىلۋ ءراسىمى ءوتتى. شاراعا ۋنيۆەرسيتەت رەكتورى بولات تىلەپ، احمەت بايتۇرسىن ۇلىنىڭ ۇرپاقتارى، احمەت بايتۇرسىن ۇلى اتىنداعى مۋزەيدىڭ جەتەكشىسى رايحان يماحانبەت باستاعان مۋزەي قىزمەتكەرلەرى جانە وقىتۋشى-پروفەسسورلار قۇرامى قاتىستى.

سالتاناتتى جيىندا بولات تىلەپ قۇتتىقتاۋ ءسوز سويلەپ، احمەت بايتۇرسىن ۇلىنىڭ 1928–1929 جىلدارى ءدال وسى ۋنيۆەرسيتەت قابىرعاسىندا قىزمەت ەتكەنىن ەرەكشە اتاپ ءوتتى. قوناقتار وقۋ ورداسىنا ۇلت ۇستازىنىڭ 150 جىلدىق مەرەيتويىنا وراي جارىق كورگەن «احمەت بايتۇرسىن ۇلى. 12 تومدىق شىعارمالار جيناعىنىڭ» قازاق جانە ورىس تىلدەرىندەگى نۇسقالارىن، سونداي-اق رايحان يماحانبەتتىڭ «عاسىر ساڭلاعى» اتتى ەڭبەگىن تارتۋ ەتتى.

شارا سوڭىندا ۋنيۆەرسيتەت رەكتورى ءبىرىنشى كۋرس ستۋدەنتتەرىنە ارناپ قوعامدىق ءدارىس وقىپ، جاڭا وقۋ جىلىنىڭ مازمۇندى باستالۋىنا جول اشتى.