قازاقستان رەسپۋبليكاسى پرەمەر-مينيسترىنىڭ ورىنباسارى ەرمەك كوشەربايەۆ گەرمانيانىڭ تۋريستىك قاۋىمداستىعىنىڭ (DRV) دەلەگاسياسىمەن، سونداي-اق جەتەكشى نەمىس تۋروپەراتورلارىمەن كەزدەسۋ وتكىزىپ، تۋريزم سالاسىنداعى ىنتىماقتاستىق ماسەلەلەرىن تالقىلادى.

كەزدەسۋگە گەرمانيا تۋريستىك قاۋىمداستىعىنىڭ پرەزيدەنتى نوربەرت اندرەاس فيبيگ، نەمىس تۋروپەراتورلارىنىڭ وكىلدەرى، سونداي-اق قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ قاتىستى.

كەزدەسۋدى اشا وتىرىپ، ەرمەك كوشەربايەۆ قازاقستان گەرمانيا فەدەراتيۆتىك رەسپۋبليكاسىمەن بايلانىستاردى نىعايتۋعا ەرەكشە ءمان بەرەتىنىن، ال تۋريزم ەكىجاقتى ىنتىماقتاستىقتى دامىتۋدىڭ ماڭىزدى باعىتى بولىپ سانالاتىنىن اتاپ ءوتتى. 

«قازاقستان ءۇشىن تۋريزم – تەك ەكونوميكانىڭ سالاسى عانا ەمەس، ەكى ەل اراسىنداعى سەنىم كوپىرى. گەرمانيامەن ىنتىماقتاستىق ءبىزدىڭ ەلىمىزدى ەۋروپالىق نارىقتا ىلگەرىلەتۋ ءۇشىن جاڭا مۇمكىندىكتەر اشادى. DRV Destination Forum-دى قازاقستاندا وتكىزۋ مۇمكىندىگىن تالقىلاۋ ءوزارا قىزىعۋشىلىقتى ارتتىرۋ مەن ارىپتەستىكتى دامىتۋ جولىنداعى ماڭىزدى قادام »، – دەدى ۆيسە-پرەمەر.

كەزدەسۋدىڭ نەگىزگى تاقىرىبى – نەمىس نارىعىندا قازاقستاندى تۋريستىك باعىت رەتىندە ىلگەرىلەتۋ پەرسپەكتيۆالارى، سونداي-اق 2026 جىلى ەلىمىزدە DRV Destination Forum-دى وتكىزۋ مۇمكىندىگىن قاراستىرۋ بولدى.

گەرمانيا تۋريستىك قاۋىمداستىعىنىڭ پرەزيدەنتى نوربەرت اندرەاس فيبيگ نەمىس تۋريستىك نارىعى ءۇشىن قازاقستاننىڭ تارتىمدىلىعىن اتاپ ءوتتى. 

«قازاقستانعا كەلىپ، ونىڭ تۋريستىك الەۋەتىن ءوز كوزىمىزبەن كورۋگە مۇمكىندىك تۋعانىنا قۋانىشتىمىز. ەلىڭىزدىڭ بىرەگەي تابيعاتى، باي تاريحى جانە زاماناۋي دامۋى ونى نەمىس تۋريستەرى ءۇشىن تارتىمدى باعىت ەتەدى. نەمىس تۋريستەرى جىل سايىن 85 ملرد ەۋرودان استام قارجى جۇمسايدى، جانە ءبىز قازاقستاننىڭ ولاردىڭ تاڭداۋلى باعىتتارىنىڭ قاتارىنان لايىقتى ورىن الاتىنىنا سەنىمدىمىز»، – دەدى ول.

نەمىس دەلەگاسياسىنىڭ ساپار باعدارلاماسىنا استانا، الماتى جانە بايقوڭىر قالالارىنا بارۋ ەنگىزىلگەن. قوناقتار قازاقستاننىڭ تۋريستىك الەۋەتىمەن جانە بىرلەسكەن جوبالاردى دامىتۋ مۇمكىندىكتەرىمەن تانىسادى.

كەزدەسۋ سوڭىندا ەرمەك كوشەربايەۆ قازاقستان مەن گەرمانيانىڭ بىرلەسكەن كۇش-جىگەرى ەكى ەل اراسىنداعى ىنتىماقتاستىق پەن دوستىقتى ودان ءارى نىعايتۋعا سەپتىگىن تيگىزەتىنىنە سەنىم ءبىلدىردى.