رۋسلان جەلدىباي پرەزيدەنت قاسىم-جومارت توقايەۆتىڭ كومەكشىسى ءارى باسپا ءسوز حاتشىسى بولىپ تاعايىندالدى، دەپ حابارلادى اقوردا.
«مەملەكەت باسشىسىنىڭ جارلىعىمەن رۋسلان سۇلتان ۇلى جەلدىباي قازاقستان رەسپۋبليكاسى پرەزيدەنتىنىڭ كومەكشىسى – پرەزيدەنتتىڭ باسپا ءسوز حاتشىسى بولىپ تاعايىندالدى، ول بۇرىنعى اتقارعان لاۋازىمىنان بوسادى»، - دەپ حابارلاعان اقوردا.
سونداي-اق، توقايەۆتىڭ جارلىعىمەن قۋانىشبەك ەسەكەيەۆ پرەزيدەنتتىڭ كومەكشىسى بولىپ تاعايىندالدى، ول دا بۇرىنعى اتقارعان لاۋازىمىنان بوسادى. ال پرەزيدەنتتىڭ پروتوكولى قىزمەتىنىڭ باستىعى ءارى پرەزيدەنتتىڭ كەڭەسشىسى لاۋازىمىنا مارات ءاشىم تاعايىندالدى.
رۋسلان جەلدىباي 1989 جىلى جامبىل وبلىسىندا دۇنيەگە كەلگەن. رىسقۇلوۆ اتىنداعى قازاق ەكونوميكالىق ۋنيۆەرسيتەتىن جانە ۋورۆيك ۋنيۆەرسيتەتىن (ۇلىبريتانيا) بىتىرگەن. "بولاشاق" باعدارلاماسىنىڭ تۇلەگى.
ەڭبەك جولىن 2012 جىلى "قازاقستان" تەلەارناسىندا رەداكتور بولىپ باستاعان.
- 2012-2018 جىلدارى – "الماتى" تەلەارناسىندا ءبولىم مەڭگەرۋشىسى، پروديۋسەر؛
- 2018-2019 جىلدارى – اقپارات جانە كوممۋنيكاسيالار كوميتەتىنىڭ ينتەرنەت كەڭىستىگىندەگى جانە الەۋمەتتىك جەلىلەردەگى اقپاراتتىق جۇمىس باسقارماسىنىڭ باسشىسى؛
- 2019-2020 جىلدارى – اقپارات جانە الەۋمەتتىك دامۋ مينيسترلىگى اقپارات كوميتەتى ءتوراعاسىنىڭ ورىنباسارى؛
- 2020 جىلعى مامىردان 2022 جىلعى اقپانعا دەيىن پرەزيدەنت اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى بولدى؛
- 2022 جىلدىڭ اقپانىنان ساۋىرىنە دەيىن پرەمەر-مينيستر كەڭسەسى باسشىسىنىڭ ورىنباسارى قىزمەتىن اتقاردى.
- ول 2022 جىلدىڭ ساۋىرىنەن 2023 جىلدىڭ قاڭتارىنا دەيىن پرەزيدەنتتىڭ باسپا ءسوز حاتشىسى قىزمەتىن اتقاردى.
-
2023 جىلعى 1 قىركۇيەكتەن 2025 جىلدىڭ 17 اقپانىنا دەيىن – قازاقستان پرەزيدەنتىنىڭ ىشكى ساياسات ماسەلەلەرى جانە كوممۋنيكاسيالار جونىندەگى كومەكشىسى.
2025 جىلعى 17 اقپاننان بۇگىنگە دەيىن قازاقستان پرەزيدەنتىنىڭ كەڭەسشىسى – باسپا ءسوز حاتشىسى قىزمەتىن اتقارعان.
