بۇعان دەيىن الماتىداعى اكادەمقالاشىق تۇرعىندارى ۇيلەرىنىڭ ماڭىندا جاڭا عيمارات سالۋعا قارسى شىققان بولاتىن. تۇرعىنداردىڭ باستاماشىل توبىنىڭ ءۋاجى بويىنشا، بۇل جوبا قالا قۇرىلىسى، ەكولوگيالىق جانە سەيسميكالىق تالاپتارعا قايشى. ۋاجدەرىن العا تارتقان باستاماشىل توپ پرەزيدەنت اتىنا ۇندەۋ جولداعان ەدى.

«ءبىز بۇل جوبانىڭ جۇزەگە اسىرىلۋىنا ۇزىلدى-كەسىلدى قارسىمىز! قۇرىلىس ءبىزدىڭ ۇيلەرگە وتە جاقىن جەردە جۇرگىزىلمەك. جوبانىڭ سىزباسىنا قاراعاندا، جاڭا عيماراتتار بارلىق بوس جەردى تۇگەل الىپ قويادى. بۇل جەر تەلىمى جەر سىلكىنىسى ءقاۋپى جوعارى تەكتونيكالىق جارىلىس ايماعىنا تىم جاقىن ورنالاسقان. سوندىقتان بۇعان دەيىن مۇندا قۇرىلىس سالۋعا رۇقسات بەرىلمەگەن بولاتىن. ءقازىر بۇل اۋماقتا جۇزدەن استام اعاش ءوسىپ تۇر.

ءال-فارابي داڭعىلى ءقازىردىڭ وزىندە ءتۇرلى تۇرعىن جانە ىسكەرلىك كەشەندەرمەن تىعىز تولى. بۇل قالامىزداعى نەگىزگى كولىك جولدارىنىڭ ءبىرى.  جاڭا بيزنەس-ورتالىق سالۋدىڭ ەش قاجەتى جوق، ويتكەنى ول كولىك قوزعالىسىن ودان ءارى قيىنداتىپ، ەكولوگيالىق جانە تۇرمىستىق جاعدايدى ناشارلاتادى»، – دەلىنگەن اكادەمقالاشىق تۇرعىندارىنىڭ ۇندەۋىندە.

اڭگىمە «ءال-فارابي ىسكەرلىك ورتالىعى» دەپ اتالاتىن اۋقىمدى جوبا تۋرالى بولىپ وتىر. جوبالىق سىزباعا سايكەس، بۇل كەشەننىڭ قۇرامىنا  بيزنەس-ورتالىق، اپارت-وتەلدەر جانە باسقا دا كوممەرسيالىق نىساندار كىرەدى. 

تۇرعىندار كوتەرگەن ماسەلەگە وراي جۋرناليستەرگە تۇسىنىكتەمە بەرگەن SABA Group KZ كومپانياسى باسشىلىعى جوبا قۇرىلىسى جايىندا ءمان-جايدى تاپتىشتەپ ايتىپ بەردى. 

SABA Group KZ كومپانياسىنىڭ پرەزيدەنتى ءىلياس كاربوزوۆتىڭ ايتۋىنشا، بۇل جوبا ءقوناقۇي بيزنەسىن دامىتۋعا باعىتتالعان ينۆەستيسيالىق جوبالار تىزىمىنە ەنگىزىلگەن. جوبا اياسىندا ەكى دەڭگەيلى ۇلكەن جەراستى اۆتوتۇراعى بار بيزنەس-ورتالىق سالۋ كوزدەلگەن. 

«بۇل جوبا جاڭا جۇمىس ورىندارىن اشىپ، شامامەن 1 500 ادامدى قامتاماسىز ەتەدى جانە ءوزىنىڭ ەرەكشە ساۋلەتتىك شەشىمىمەن قالانىڭ كەلبەتىن ايشىقتايتىن بىرەگەي نىسان بولماق. جەرگىلىكتى بيۋدجەتكە قانشاما سالىق تۇسەدى»، – دەدى كومپانيا باسشىسى.

سونداي-اق، ول اتالعان جەر تەلىمى ەشقانداي شەكتەۋ ايماعىنا كىرمەيتىنىن جەتكىزدى. «پرەزيدەنت قالانىڭ جوعارعى بولىگىندە، ياعني ءال-فارابي داڭعىلىنان جوعارى اۋماقتا قۇرىلىس جۇرگىزۋگە موراتوريي ەنگىزگەن. الماتى قالاسى اكىمدىگىنىڭ 2023 جىلعى №4/727 قاۋلىسىنا سايكەس، بيىك عيماراتتار سالۋعا بولمايتىن شەكتەۋلى قۇرىلىس ايماعىنا ءال-فارابي داڭعىلىنان جوعارى ورنالاسقان جەرلەر جاتادى. ءبىزدىڭ جەر تەلىمىمىز قوعامدىق-ىسكەرلىك ايماققا كىرەتىن بولعان سوڭ قالانىڭ باس جوسپارىنا ساي كەلەدى. دەتالدى جوسپارلاۋ جوباسى مەن جەردىڭ نىسانالى ماقساتى دا باس جوسپارعا سايكەس.

بۇل تەلىم تەكتونيكالىق جارىلىس ايماعىندا ورنالاسپاعان. الماتى قالاسى بويىنشا جارىلىستار سىزباسىنا سايكەس، جارىلىس سىزىعى ءبىزدىڭ ۋچاسكەمىزدەن جوعارىراق، ياعني «ءال-فارابي» جوباسىنان وڭتۇستىكتە وتەدى»، – دەدى ءىلياس كاربوزوۆ.

راسىندا دا، الماتى قالاسىنىڭ سەيسميكالىق جارىلىستار كارتاسىنا سايكەس، وسى اۋماقتاعى تەكتونيكالىق جارىق سىزىعى ءال-فارابي داڭعىلىنان جوعارىراق وتەدى. وسى تۇرعىدا كومپانيا باسشىلىعى تۇرعىندارمەن تۋىنداعان داۋعا قاتىستى نە دەيدى؟ 

«بۇل جەردە تۇرعىندار دەگەندە جالپىلاما ايتۋعا بولمايدى. سەبەبى، ونشاقتى ادام عانا نارازىلىق تانىتىپ ءجۇر. جەكە مۇددەسىن قورعاۋعا تىرىسقان ولار كومپانياعا قارسى اقپاراتتىق شابۋىل جاساپ، جوبا تۋرالى دەرەكتەردى بۇرمالاپ، قوعام اراسىندا تەرىس پىكىر قالىپتاستىرۋعا ۇمتىلۋدا. جەر تەلىمى اكادەمقالاشىقتىڭ ىشىندە ەمەس. ءبىز بولاشاقتا قۇرىلىس جۇمىسى باستالعاندا ەسكەرۋ ءۇشىن ءار ءۇيدىڭ وكىلىمەن كەزدەسىپ، قانداي ءوتىنىشى، ماسەلەسى، سۇرانىسى بار ەكەنىن سۇرادىق. بۇل جاعىنان تاجىريبە جەتكىلىكتى، – دەيدى. 

كومپانيانىڭ تۇسىندىرۋىنشە، 1،2491 گەكتاردى الاتىن جەر تەلىمى 2025 جىلدىڭ قازان ايىندا قوماقتى اقشاعا ساتىپ الىنعان. سودان كەيىن بىردەن تۇرعىندارمەن كەزدەسۋ وتكىزىلىپ، جوبانىڭ باس جوسپارى تانىستىرىلىپتى. 

«قازىرگى ۋاقىتتا ەشقانداي قۇرىلىس-مونتاج جۇمىستارى جۇرگىزىلىپ جاتقان جوق. باس جوسپار مەن دەتالدى جوسپارلاۋ جوباسى الماتى قالاسى ءماسليحاتىنىڭ شەشىمىمەن بەكىتىلگەن. ۋچاسكە وسى بەكىتىلگەن جوسپارلارمەن جانە نىسانالى ماقساتى بار قۇجاتتارمەن بىرگە ساتىپ الىندى. 2025 جىلدىڭ قازان ايىنان بەرى ەشقانداي وزگەرىستەر ەنگىزىلگەن جوق»، – دەدى ال SABA Group KZ ديرەكتورلار كەڭەسىنىڭ مۇشەسى قايرات دانييەۆ.  

«بىزدە ءدال ءقازىر رۇقسات قاعاز بار دەپ  ايتا المايمىز. جوبانى وزگەرتىپ، قايتادان ساراپتامادان ءوتىپ، قاۋلى الامىز. ال جوبانى 2026 جىلدىڭ ءبىرىنشى، ەكىنشى توقسانىندا باستاپ، ءبىر جارىم جىلدا بىتىرەمىز. كەلەسى اپتادا الماتى اكىمدىگىنەن وكىلدەر كەلىپ تۇرعىندارمەن كەزدەسۋ وتكىزەدى. دەگەنمەن، قالا اكىمدىگى بۇعان دەيىن ءبارى زاڭدى ەكەندىگىن ايتتى»، – دەيدى. 

ايتا كەتۋ كەرەك، سارسەنبى كۇنى وتكەن بريفينگتە الماتى قالاسى اكىمىنىڭ ورىنباسارى بەيبىت شاحانوۆ وسى ماسەلەگە قاتىستى سۇراققا: 

«اتالعان نىسان ءبىزدىڭ بارلىق قالا قۇرىلىسى قۇجاتتارىنا ساي كەلەدى. قازىرگى ۋاقىتتا ونىڭ زاڭدىلىعىنا قاتىستى ەشقانداي كۇمان جوق. دەگەنمەن، ازىرگە كومپانيا بارلىق وتىنىمدەرىمەن تولىق بىزگە كەلىپ ۇلگەرگەن جوق. الدىن الا ايتقاندا، بۇل جوبانى جۇزەگە اسىرۋعا ولاردىڭ قۇقىعى بار، ويتكەنى ول ءبىزدىڭ باس جوسپار مەن دەتالدى جوسپارلاۋ جوباسىنا (دجج) سايكەس كەلەدى. وندا كەڭسەلەر مەن ءقوناقۇي سالۋ كوزدەلگەن.  سوندىقتان تۇرعىنداردىڭ پىكىرىن جانە ءبىزدىڭ تالاپتاردى ەسكەرە وتىرىپ، بۇل جوبانى جۇزەگە اسىرۋعا قۇقىعى بار دەپ سانايمىز» دەپ جاۋاپ بەرگەن بولاتىن.