الماتى قالاسىنىڭ پوليسيا قىزمەتكەرلەرى مەن ءدىن ىستەرى باسقارماسىنىڭ اقپاراتتىق توبى بىرلەسىپ، ەكسترەميزم مەن كيبەرقىلمىستىڭ الدىن الۋ تاقىرىبىندا حالىقپەن پروفيلاكتيكالىق كەزدەسۋ ۇيىمداستىردى.
ءىس-شارانىڭ ماقساتى - جاستار اراسىنداعى قۇقىق بۇزۋشىلىقتاردىڭ الدىن الۋ، كيبەركەڭىستىكتە قۇقىقتىق ساۋاتتىلىقتى ارتتىرۋ، سونداي-اق ەكسترەميزمنىڭ، كيبەربۋللينگتىڭ جانە باسقا دا زاماناۋي قاۋىپتەردىڭ الدىن الۋ. كەزدەسۋ بارىسىندا جينالعاندارعا ەكسترەميزم مەن دىني-دەسترۋكتيۆتى اعىمداردىڭ زيانى، ينتەرنەت كەڭىستىگىندە بالالار مەن جاستاردى قورعاۋ، كيبەربۋللينگتىڭ سالدارى جانە ونىڭ الدىن الۋ جولدارى تۋرالى ءتۇسىندىرىلدى. سالا ماماندارى، ءدىنتانۋشىلار مەن پوليسيا قىزمەتكەرلەرى ءوز تاجىريبەلەرىمەن ءبولىسىپ، پىكىر الماستى.
سونىمەن قاتار اتا-انالارعا بالالارىنىڭ ينتەرنەتتەگى ارەكەتتەرىن باقىلاۋ جانە جاستاردى دۇرىس تاربيەلەۋ قاجەتتىلىگى تۋرالى ۇسىنىستار بەرىلدى. كەزدەسۋ اشىق ديالوگ فورماتىندا ءوتتى، وزەكتى ماسەلەلەر تالقىلانىپ، قوعامداعى قاۋىپسىزدىكتى ارتتىرۋ باعىتتارى اتاپ ءوتىلدى.
