الماتىدا رەسپۋبليكا كۇنىنە وراي ۇزدىك پوليسەيلەر ماراپاتتالدى. الماتى قالاسى پوليسيا دەپارتامەنتىندە رەسپۋبليكا كۇنىنە ارنالعان سالتاناتتى جيىن ءوتتى.
مەرەكەلىك شاراعا پوليسيا قىزمەتكەرلەرى، ىشكى ىستەر ورگاندارىنىڭ ارداگەرلەرى جانە "جاس ساقشى" سىنىپتارىنىڭ وقۋشىلارى قاتىستى. بۇل كۇن – قوعامعا ادال قىزمەت ەتۋدى، ازاماتتاردىڭ تىنىشتىعى مەن قاۋىپسىزدىگىن قامتاماسىز ەتۋدى ءوز بورىشى ساناعان جاندار ءۇشىن ەرەكشە ماڭىزعا يە مەرەكە بولدى.
سالتاناتتى جيىندا الماتى قالاسى پوليسيا دەپارتامەنتى باستىعىنىڭ ءبىرىنشى ورىنباسارى قۋاتبەك ناۋاتوۆ قۇتتىقتاۋ ءسوز سويلەپ، ارىپتەستەرىنە ىزگى تىلەگىن جەتكىزدى.
– رەسپۋبليكا كۇنى – ءوز ەلىن سۇيەتىن، ونىڭ بولاشاعىنا سەنەتىن ءاربىر ازاماتتىڭ مەرەكەسى. ال پوليسيا قىزمەتكەرلەرى ءۇشىن بۇل كۇن ەرەكشە جاۋاپكەرشىلىكتى بىلدىرەدى. سەبەبى قوعامنىڭ تىنىشتىعى مەن ءتارتىبى، ازاماتتاردىڭ ەرتەڭگى كۇنگە دەگەن سەنىمى كوپ جاعدايدا ءبىزدىڭ كاسىبي بورىشىمىزعا بايلانىستى، – دەدى قۋاتبەك ناۋاتوۆ.
ول تۇراقتىلىق پەن قوعامدىق قاۋىپسىزدىك – مىڭداعان ءتارتىپ ساقشىسىنىڭ كۇندەلىكتى، كوپشىلىككە بايقالا بەرمەيتىن، ءبىراق اسا ماڭىزدى ەڭبەگىنىڭ ناتيجەسى ەكەنىن اتاپ ءوتتى.
– ءبىز ءوز قىزمەتىن ادال اتقارىپ، ەرلىك پەن كاسىبي شەبەرلىكتىڭ ۇلگىسىن كورسەتىپ جۇرگەن ارىپتەستەرىمىزدى ماقتان تۇتامىز. بۇگىن تابىس ەتىلگەن ماراپاتتار – ولاردىڭ ورتاق ىسكە قوسقان ەڭبەگىنىڭ جانە الماتىلىقتاردىڭ سەنىمى مەن قۇرمەتىنىڭ كورىنىسى، – دەدى ول.
ءىس-شارا بارىسىندا الماتى پوليسياسىنىڭ ۇزدىك قىزمەتكەرلەرى مەن ءبولىم باسشىلارى ماراپاتتالىپ، العىس حاتتارعا يە بولدى. ولاردىڭ قاتارىندا اۋىر قىلمىستاردى اشۋدا، قوعامدىق ءتارتىپتى ساقتاۋدا جانە قۇقىق بۇزۋشىلىقتاردىڭ الدىن الۋدا ەرەكشە كوزگە تۇسكەن وفيسەرلەر بار. ءسوزىنىڭ سوڭىندا قۋاتبەك ناۋاتوۆ ارىپتەستەرىنە مىقتى دەنساۋلىق، وتباسىنىڭ اماندىعىن جانە قىزمەتتە تابىس تىلەدى.
– ءبىز بۇل مەرەكەنى بىرلىك پەن جاۋاپكەرشىلىك رۋحىمەن قارسى الامىز. وسى رۋح ءار ىسىمىزدە سەرىك بولسىن. ءار قىزمەت كۇنى – مىقتى، ءقاۋىپسىز جانە سەنىمدى قازاقستان رەسپۋبليكاسىنا اپارار ءبىر قادام بولسىن، – دەپ تۇيىندەدى ول.
