الماتى پوليسياسى الەۋمەتتىك جەلىدەگى جاريالانىم استىندا جارىلىس جاساۋ كەرەك ورىن تۋرالى قورقىتۋ مازمۇنىندا پىكىر قالدىرعان ەر ادامدى ۇستادى، دەپ حابارلايدى Qamshy.kz اقپاراتتىق اگەنتتىگى.

ءدىني بىرلەستىكتەردىڭ قىزمەتىنە قاتىستى جاريالانىمنىڭ استىنا بەلگىسىز قولدانۋشى جازبا قالدىرىپ، بۇل دەرەك بويىنشا «102» پۋلتىنە حابارلاما تۇسكەن. وعان قالالىق پوليسيا دەپارتامەنتىنىڭ ەكسترەميزمگە قارسى كۇرەس باسقارماسىنىڭ قىزمەتكەرلەرى جەدەل ارەكەت ەتتى.

«جارىپ جىبەرۋ كەرەك ورىن»، – دەپ جازعان 2GIS-كە.

جۇرگىزىلگەن شارالار بارىسىندا پىكىر اۆتورىنىڭ جەكە باسى انىقتالدى. ول – 2004 جىلى تۋعان الماتى تۇرعىنى. ەر ادام ۇستالىپ، پوليسيا بولىمشەسىنە جەتكىزىلدى.

«ينتەرنەتتە جازىلعان بولسا دا، كەز كەلگەن قورقىتۋ پوليسيا تاراپىنان قوعامدىق قاۋىپسىزدىككە تونەتىن ناقتى ءقاۋىپ رەتىندە قارالادى. مۇنداي «ازىلدەردىڭ» اۋىر سالدارى بولۋى مۇمكىن. ءاربىر حابارلاما مۇقيات تەكسەرىلىپ، كىنالىلەر زاڭعا سايكەس جاۋاپكەرشىلىككە تارتىلادى»، – دەدى الماتى قالاسى پد ەكسترەميزمگە قارسى كۇرەس باسقارماسىنىڭ باستىعى اسحات داۋلەتياروۆ.

پوليسيا الەۋمەتتىك جەلىلەردى پايدالانۋدا جاۋاپكەرشىلىك تانىتۋعا، قورقىتۋ نەمەسە زاڭعا قايشى مازمۇنداعى حابارلامالاردى جاريالاماۋعا شاقىرادى.