رەسپۋبليكا كۇنى مەن مەملەكەتتىك ەگەمەندىك تۋرالى دەكلاراسيانىڭ 35 جىلدىعىنا وراي، مەگاپوليستە «كەلەشەك مەكتەپتەرى» ۇلتتىق جوباسى اياسىندا ءتورت جاڭا ءبىلىم ورداسى پايدالانۋعا بەرىلدى، دەپ حابارلايدى Qamshy.kz اقپارات اگەنتتىگى. 

جاڭا مەكتەپتەر الاتاۋ، مەدەۋ جانە ناۋرىزباي اۋداندارىندا ورنالاسقان. وندا جالپى 8 000-عا جۋىق وقۋشى ءبىلىم الادى.

وقۋ كابينەتتەرى زاماناۋي جيھازبەن، ينتەراكتيۆتى تاقتالارمەن جانە مۋلتيمەديالىق قۇرىلعىلارمەن جابدىقتالعان. حيميا، فيزيكا جانە بيولوگيا پاندەرىنە ارنالعان زەرتحانالار تاجىريبەلىك ساباقتار وتكىزۋگە تولىق مۇمكىندىك بەرەدى.

ءار مەكتەپتە كەڭ سپورت جانە اكت زالدارى، كىتاپحانا مەن مەدياتەكا، ۇيىرمە بولمەلەرى مەن دەمالىس ايماقتارى بار. اسحانالار جاڭا تەحنولوگيالىق قۇرالدارمەن جابدىقتالىپ، تاعام دايىنداۋدىڭ تولىق سيكلى قامتاماسىز ەتىلگەن.

عيماراتتار قاۋىپسىزدىك پەن قولجەتىمدىلىك تالاپتارىنا ساي سالىنعان: بەينەباقىلاۋ جۇيەسى، ءورت دابىلى جانە كىرۋدى باقىلاۋ جۇيەلەرى ورناتىلعان. مەكتەپ اۋماقتارى اباتتاندىرىلىپ، كوگالداندىرىلىپ، جارىقتاندىرىلعان.