ءبىر جىلعا جۋىق جاسىرىنعان نوبەل لاۋرەاتى وسلوعا جەتتى. ساياسي قۋعىننان قاشىپ جۇرگەن ۆەنەسۋەلالىق ماريا كورينا ماچادو وسلوداعى نوبەل بەيبىتشىلىك سىيلىعىن الۋ ءۇشىن جاسىرىن جاعدايدا كەلىپ، العاش رەت 11 ايدان كەيىن كوپشىلىك الدىنا شىقتى.

58 جاستاعى ماچادو ءتۇن ورتاسىندا ءقوناقۇي بالكونىنان قول بۇلعاپ، جينالعان قولداۋشىلارىن قۋانتتى. ول ەلدەن قۇپيا تۇردە شىعىپ، 10 اسكەري بەكەتتەن ءوتىپ، قايىقپەن جاسىرىن جولمەن كەتۋگە ءماجبۇر بولعان.

ماچادو نوبەل سىيلىعىن «ۆەنەسۋەلادا ديكتاتۋرادان دەموكراتياعا بەيبىت ءوتۋدى قامتاماسىز ەتۋ جولىنداعى كۇرەسى» ءۇشىن يەلەندى. ول نورۆەگياعا ساپارى ءۇشىن ۆەنەسۋەلا بيلىگى ءوزىن «تەرروريست» دەپ ايىپتاپ، قاماۋعا الۋعا بۇيرىق بەرگەنىن ايتتى.

«قانداي ءقاۋىپ بارىن جاقسى بىلەمىن. ءبىراق مەن مىندەتتى تۇردە ۆەنەسۋەلاعا قايتا ورالامىن»، – دەيدى ول.

ماريا كورينا ماچادو نوبەل كوميتەتىمەن بىرگە وتىرعان سۇحباتتا «ماعان وسلوعا جەتۋگە كومەكتەسكەن ادامدار ءومىرىن قاتەرگە تىكتى» دەپ كوز جاسىن تىيا المادى. 

ماچادو ءبىر جىلدان استام ۋاقىت جاسىرىن تۇردە ءومىر ءسۇرىپ كەلەدى. نورۆەگياداعى سالتاناتتا ونىڭ ورنىنا قىزى انا كورينا سوسا ءسوز سويلەپ، اناسىنىڭ «ۆەنەسۋەلا قايتا تىنىستايدى» دەگەن ۇندەۋىن جەتكىزگەن.

بۇعان دەيىن نوبەل كوميتەتىنىڭ ءتوراعاسى يورگەن ۆاتنە فريدنەس ماچادونىڭ «اسا ءقاۋىپتى جاعدايداعى ۇزاق ساپاردان كەيىن» وسلوعا كەلە جاتقانىن، ءبىراق راسىمگە ۇلگەرمەگەنىن ايتقان. كەيىنىرەك ماچادو اۋديوجازبادا ءوزىن ەلدەن شىعارىپ اكەتكەندەرگە العىس ءبىلدىرىپ، «جاقىندا جەتەمىن» دەپ حابارلاعان.

سالتاناتقا لاتىن امەريكاسى ەلدەرىنىڭ پرەزيدەنتتەرى، سونداي-اق ماچادونىڭ كانديداتۋراسىنا الماستىرىلعان ءارى سايلاۋدا جەڭدى دەپ ەسەپتەلەتىن ەدمۋندو گونسالەس قاتىستى. نورۆەگيا كورولدىك وتباسى دا راسىمدە بولدى.

پيانيست گابريەلا مونتەرو ۆەنەسۋەلادان كەتكەن 8 ميلليون بوسقىننىڭ ساعىنىشىن بەينەلەيتىن Mi Querencia تۋىندىسىن ورىندادى.