سولتۇستىك كورەيا جاپونيانىڭ يادرولىق قارۋ يەلەنۋ نيەتىنە قاتاڭ ەسكەرتۋ جاسادى.

سولتۇستىك كورەيا جاپونيانىڭ يادرولىق قارۋ يەلەنۋ ارەكەتىن «كەز كەلگەن جولمەن توقتاتۋ قاجەت» دەپ مالىمدەدى.

پحەنياننىڭ بۇل ۇستانىمى جاپونيا پرەمەر-مينيسترى كەڭسەسىندەگى ءبىر شەنەۋنىكتىڭ «توكيو يادرولىق قارۋعا يە بولۋى ءتيىس» دەگەن سوزىنە جاۋاپ رەتىندە ايتىلدى. بۇل تۋرالى سولتۇستىك كورەيانىڭ مەملەكەتتىك KCNA اگەنتتىگى حابارلادى.

سولتۇستىك كورەيا سىرتقى ىستەر مينيسترلىگىنە قاراستى جاپونيانى زەرتتەۋ ينستيتۋتىنىڭ ديرەكتورى جاپونيانىڭ مۇنداي مالىمدەمەلەرى كەزدەيسوق نەمەسە جاۋاپسىز ايتىلعان ءسوز ەمەس، كەرىسىنشە ەلدىڭ «ۇزاق جىلدان بەرگى يادرولىق قارۋلانۋ نيەتىن» ايقىن كورسەتەدى دەپ باعالادى. ونىڭ ايتۋىنشا، جاپونيانىڭ يادرولىق قارۋلار تۋرالى قاعيدالارىن قايتا قاراۋى ايماقتىق قاۋىپسىزدىككە تىكەلەي قاتەر توندىرەدى. الايدا سولتۇستىك كورەيا مالىمدەمەسىندە ءوزىنىڭ يادرولىق باعدارلاماسى تۋرالى ايتىلمادى.

پحەنيان وكىلى جاپونيانىڭ يادرولىق قارۋعا يە بولۋى ازيا ەلدەرى ءۇشىن اۋىر سالدارعا اكەلىپ، بۇكىل ادامزاتقا ءقاۋىپ ءتوندىرۋى مۇمكىن ەكەنىن ايتتى. سولتۇستىك كورەيا تاراپى مۇنى «قىزىل سىزىقتان ءوتۋ» دەپ اتاپ، توكيونىڭ ارەكەتتەرىن قاتاڭ سىنعا الدى.

سولتۇستىك كورەيالىق ب ا ق بۇل پىكىرلەر اقش-تىڭ وڭتۇستىك كورەياعا يادرولىق قۋاتپەن جۇرەتىن سۋاستى قايىعىن سالۋعا رۇقسات بەرۋىنەن كەيىن ايتىلعانىن اتاپ ءوتتى. اقش پرەزيدەنتى دونالد ترامپ سەۋلگە مۇنداي رۇقساتتى وڭتۇستىك كورەيا پرەزيدەنتى لي دجە مونمەن وتكەن كەزدەسۋ بارىسىندا بەرگەن.

دەگەنمەن سولتۇستىك كورەيا مالىمدەمەسىندە پحەنياننىڭ يادرولىق باعدارلاماسى تۋرالى ءسوز قوزعامادى. پحەنيان بۇعان دەيىن دە يادرولىق قارۋدان باس تارتپايتىنىن بىرنەشە رەت مالىمدەگەن. قىركۇيەكتە بۇۇ مىنبەرىندە سويلەگەن سولتۇستىك كورەيانىڭ ۆيسە-سىرتقى ىستەر ءمينيسترى كيم سون گون يادرولىق قارۋ ەلدىڭ مەملەكەتتىك ساياساتى مەن ەگەمەن قۇقىعى ەكەنىن ايتىپ، بۇل ۇستانىمنان ەشقاشان باس تارتپايتىنىن جەتكىزگەن ەدى.