قازاق ءتىلىن وقىتۋعا ارنالعان Steppe Rider ويىنىنىڭ قۇنى قوعامدا تالقىلاۋ تۋعىزدى. جوبانىڭ قىمبات بولۋىن عىلىم جانە جوعارى ءبىلىم مينيسترلىگى بىرنەشە فاكتورعا بايلانىستىرىپ وتىر.

مينيسترلىككە قاراستى ءتىل ساياساتى كوميتەتىنىڭ ءتوراعاسى ەربول تلەشيەۆ ورتالىق كوممۋنيكاسيالار قىزمەتىندەگى بريفينگتە Steppe Rider ويىنى بىردەن ءۇش پلاتفورماعا ارناپ ازىرلەنگەنىن ايتتى. سونىمەن قاتار جوبا تەك جاساۋمەن شەكتەلمەي، كەيىنگى تەحنيكالىق قولداۋ مەن جاڭارتۋلاردى دا قامتيدى.

مەملەكەتتىك ساتىپ الۋلار پورتالىنداعى دەرەككە سايكەس، ويىنعا بيۋدجەتتەن 241 838 392 تەڭگە بولىنگەن. ۇلتتىق بانكتىڭ 22 قاڭتارداعى باعامى بويىنشا بۇل شامامەن 477 مىڭ اقش دوللارىنا تەڭ.

كوميتەت ءتوراعاسىنىڭ ايتۋىنشا، Steppe Rider – قازاق ءتىلىن ۇيرەتۋگە باعىتتالعان وتاندىق العاشقى runner جانرىنداعى ويىن. بۇل جوبا ءتىل ساياساتىن دامىتۋ تۇجىرىمداماسى اياسىندا ىسكە اسىرىلعان.

ەربول تلەشيەۆتىڭ سوزىنشە، مۇنداي جوبالاردىڭ باعاسىن سالىستىرعاندا پلاتفورمالار سانىن ەسكەرۋ قاجەت. ونىڭ ايتۋىنشا، نارىقتا ءبىر پلاتفورماعا ارنالعان وسىنداي ويىنداردىڭ قۇنى 1 مىڭ دوللاردان 300 مىڭ دوللارعا دەيىن جەتۋى مۇمكىن.

مينيسترلىك ويىننىڭ قۇنى تەحنيكالىق كۇردەلىلىك پەن كوپپلاتفورمالى فورماتقا بايلانىستى قالىپتاسقانىن اتاپ ءوتتى.