ۋكراينا مەن رەسەي وكىلدەرى ابۋ-دابيدە اۋماقتىق ماسەلەگە قاتىستى العاشقى ءۇشجاقتى كەلىسسوز جۇرگىزدى. كەزدەسۋدە قاقتىعىستىڭ نەگىزگى ءتۇيىنى سانالاتىن اۋماقتىق داۋلار تالقىلانعان. كەلىسسوزدەردى سەنبى كۇنى جالعاستىرۋ جوسپارلانىپ وتىر.
كەزدەسۋگە ۋكراينا، رەسەي جانە ءۇشىنشى تاراپ وكىلدەرى قاتىسقان. ۋكراينا پرەزيدەنتى ۆلاديمير زەلەنسكييدىڭ ايتۋىنشا، كەلىسسوزدەردىڭ باستى تاقىرىبى – دونباسس ءوڭىرىنىڭ بولاشاعى. ول بۇل ماسەلە بويىنشا ناقتى شەشىمگە كەلۋ ءۇشىن بىرنەشە كەزەڭنەن تۇراتىن ديالوگ قاجەت ەكەنىن اتاپ ءوتتى.
زەلەنسكيي سونداي-اق اقش تاراپىنان ۋكرايناعا ارنالعان قاۋىپسىزدىك كەپىلدىكتەرى ازىرلەنگەنىن مالىمدەدى. ونىڭ سوزىنشە، بۇل كەپىلدىكتەر ىقتيمال كەلىسىمنىڭ ءبىر بولىگى بولۋى مۇمكىن. قۇجاتقا قول قويۋ ۋاقىتى ازىرگە ناقتى بەلگىلەنبەگەن، الايدا تاراپتار كۇن ءتارتىبىن كەلىسۋ باعىتىندا جۇمىس جۇرگىزىپ جاتىر.
ابۋ-دابيدەگى كەلىسسوزدەر — رەسەي مەن ۋكراينا اراسىنداعى تىكەلەي ديالوگتى جانداندىرۋعا باعىتتالعان كەزەكتى تالپىنىس. الداعى كەزدەسۋلەردە اۋماقتىق ماسەلەدەن بولەك، قاۋىپسىزدىك پەن ساياسي رەتتەۋ تەتىكتەرى دە قارالۋى مۇمكىن.
