اقش، ۋكراينا جانە رەسەي وكىلدەرىنىڭ قاتىسۋىمەن وتەتىن كەلىسسوزدەردىڭ كەلەسى كەزەڭى 1 اقپانعا جوسپارلانعان. كەزدەسۋ ابۋ-دابيدە وتەدى. 

Reuters اگەنتتىگىنىڭ مالىمەتىنشە، بۇعان دەيىن وتكەن كەزدەسۋلەر بارىسىندا تاراپتار ءوزارا قۇرمەت تانىتىپ، كەلىسىمگە كەلۋ جولدارىن ىزدەۋگە نيەتتى بولعان. امەريكالىق شەنەۋنىكتىڭ ايتۋىنشا، تالقىلاۋلار كەلىسىمدەردىڭ ناقتى تەتىكتەرىن قامتىعان. ال جەكسەنبى كۇنى وتەتىن كەزەكتى كەزدەسۋدە كەلىسسوزدەردى سوڭعى كەزەڭگە جاقىنداتۋعا باعىتتالماق. اقپارات كوزى ءانونيمدى بولۋدى سۇراعان.

اقش-تاعى Axios پورتالىنىڭ ءجۋرناليسى باراك راۆيد تە كەزدەسۋدىڭ مەرزىمىن راستادى. ونىڭ پىكىرىنشە، ءۇشجاقتى كەلىسسوزدەردىڭ قايتا جاندانۋى ماسكەۋ مەن كييەۆ اراسىنداعى ديالوگتا بەلگىلى ءبىر ىلگەرىلەۋ بار ەكەنىن كورسەتەدى. ۋكراين تاراپ وكىلدەرى وتكەن كونسۋلتاسيالاردى وڭ جانە كونسترۋكتيۆتى دەپ باعالاعان.

Reuters دەرەككوزى ۋكراينا ءۇشىن قاقتىعىستان كەيىن ازىرلەنىپ جاتقان قاۋىپسىزدىك كەپىلدىكتەرى «وتە مىقتى» بولاتىنىن اتاپ ءوتتى.

ەسكە سالايىق، بۇعان دەيىن ابۋ-دابيدە ۋكراينا ماسەلەسىنە قاتىستى ەكى كۇندىك كونسۋلتاسيالار وتكەن. تاسس اگەنتتىگىنىڭ دەرەككوزى بۇل كەزدەسۋلەردىڭ ناقتى ناتيجەلەر بەرگەنىن ايتقانىمەن، ولاردىڭ مازمۇنىن اشىپ كورسەتكەن جوق.