ەۋروپالىق كوميسسيا يلون ماسكقا تيەسىلى X الەۋمەتتىك جەلىسىندە قولدانىلاتىن Grok جاساندى ينتەللەكت چات-بوتىنا قاتىستى رەسمي تەرگەۋ باستادى. تەرگەۋگە سەبەپ – چات-بوتتىڭ ايەلدەر مەن كامەلەتكە تولماعاندارعا قاتىستى رۇقساتسىز، سەكسۋالدىق سيپاتتاعى ديپفەيك سۋرەتتەردى جاساۋعا مۇمكىندىك بەرۋى جونىندەگى اقپاراتتار.

ەو وكىلدەرىنىڭ ايتۋىنشا، تەكسەرۋ بارىسىندا Grok پەن X پلاتفورماسىنىڭ ەۋرووداقتىڭ سيفرلىق قىزمەتتەر تۋرالى زاڭى (Digital Services Act) تالاپتارىن ورىنداۋ-ورىنداماۋى انىقتالادى. بۇل زاڭ ينتەرنەت-پلاتفورمالاردى زاڭسىز جانە زياندى كونتەنتتىڭ تارالۋىن بولدىرماۋعا مىندەتتەيدى.

ەۋروكوميسسيا ءتورايىمى ۋرسۋلا فون دەر ليايەن مۇنداي ارەكەتتەردى «اقىلعا قونىمسىز ءارى ءقاۋىپتى» دەپ اتاپ، ەۋروپا ايەلدەر مەن بالالاردى سيفرلىق قورلاۋ ارەكەتتەرىنە ەشقاشان كوز جۇما قارامايتىنىن مالىمدەدى. ونىڭ سوزىنشە، تەحنولوگيالىق كومپانيالار پايدا تابۋ ءۇشىن ادام قۇقىعى مەن بالالار قاۋىپسىزدىگىن قۇربان ەتپەۋى ءتيىس.

ايتا كەتەيىك، Grok چات-بوتى بۇعان دەيىن دە سىنعا ۇشىراعان. تەرگەۋلەردەن كەيىن كومپانيا سۋرەت جاساۋ مۇمكىندىگىن تەك اقىلى قولدانۋشىلارمەن شەكتەۋگە ءماجبۇر بولدى. سونىمەن قاتار ۇلىبريتانيانىڭ مەديا رەتتەۋشىسى Ofcom دا X پلاتفورماسىنا قاتىستى جەكە تەكسەرۋ جۇرگىزىپ جاتىر. يلون ماسكىڭ ەكس-قالىڭدىعى دا ماسكتىڭ Grok پلاتفورماسىن سوتقا بەرگەن.