2026 جىلى 18 ناۋرىزدا الماتىدا ۇلتتىق كيىم كۇنىنە وراي Alatau Creative Hub ورتالىعىندا «ەتنو-Fashion» ۇلتتىق كيىمدەر فلەشموبى ءوتتى. سونىمەن قاتار، №20 كىتاپحانانىڭ ۇيىمداستىرۋىمەن الماتى ءسان جانە قىزمەت كورسەتۋ سالاسى كوللەدجىندە ۇلتتىق قۇندىلىقتاردى دارىپتەۋگە باعىتتالعان «ۇلتتىق سەزىم» اتتى ءىس-شارا ۇيىمداستىرىلدى.  

اتالعان ءىس-شارالاردىڭ ماقساتى – قازاقتىڭ ۇلتتىق كيىمدەرىنىڭ تاريحي جانە مادەني ماڭىزىن ناسيحاتتاۋ، ەتنو-fashion باعىتىن دامىتۋ، سونداي-اق ءداستۇرلى مۇرانى زاماناۋي ءسان يندۋسترياسىمەن ۇيلەستىرۋ.   ءىس-شارالارعا ديزاينەرلەر، قوعام بەلسەندىلەرى جانە سانگە قىزىعاتىن ستۋدەنتتەر قاتىسىپ، ۇلتتىق مۇراعا دەگەن قىزىعۋشىلىقتارىن تانىتتى.  

ءىس-شارا بارىسىندا كورەرمەندەرگە ۇلتتىق كيىمنىڭ مەرەكەلىك كيىم عانا ەمەس، كۇندەلىكتى ومىرگە دە لايىق ستيل ەكەنى كورسەتىلىپ، ونىڭ ەرەكشەلىكتەرى، ماعىناسى مەن تاريحى تانىستىرىلدى. سونىمەن قاتار، قاتىسۋشىلاردىڭ تانىمدىق دەڭگەيىن ارتتىرۋ ماقساتىندا ارنايى بەينە-ۆيكتورينا ۇيىمداستىرىلدى.  

ءسان كورسەتىلىمىندە Qazaq-Oner ۇلتتىق قاۋىمداستىعىنىڭ پرەزيدەنتى ايگۇل جانسەرىكوۆانىڭ «Aigul Line» توپتاماسى، «Alatau» ورتالىعىنىڭ «يۋنايا مودەل» ۇيىرمەسىنىڭ «الاشا» توپتاماسى، سونداي-اق Adel Model Academy جانە Icon Modeling اگەنتتىكتەرىنىڭ مودەلدەرى ونەر كورسەتتى.   ال «ۇلتتىق سەزىم» ءىس-شاراسىندا تىگىنشى-ديزاينەر، «ارۋ-اي» برەندىنىڭ نەگىزىن قالاۋشى، «التىن القا» يەگەرى ساندۋعاش مىرزابەك قىزى ۇلتتىق كيىمنىڭ ءمانى مەن ونىڭ قازىرگى ساندەگى ورنى تۋرالى وي ءبولىستى.  

جيىن سوڭىندا قاتىسۋشىلارعا العىس حاتتار مەن كىتاپتار سىيعا تارتىلدى.   اتالعان ءىس-شارالار ءتول مادەنيەتىمىزدى دارىپتەپ، ۇلتتىق ناقىشتى زاماناۋي ستيلمەن ۇيلەستىرۋگە ىقپال ەتەدى.