بۇگىن «Almaty Arena» مۇز سارايى كوكتەمنىڭ اۋەزدى ىرعاعىمەن مىڭداعان بالا جۇرەگىن توعىستىرعان بىرەگەي مادەني وقيعانىڭ ورتالىعىنا اينالدى. الماتى قالاسى ءبىلىم باسقارماسى ۇيىمداستىرعان اۋقىمدى جوبا ۇلتتىق رەكورد ورناتىپ، ەل تاريحىنا التىن ارىپپەن جازىلدى.
باستامانىڭ ماقساتى – ناۋرىز مەيرامى قارساڭىندا قالا تۇرعىندارى مەن قوناقتارىنا مەرەكەلىك كوڭىل كۇي سىيلاۋمەن قاتار، شاھارداعى جاس مۋزىكانتتاردى ورتاق شىعارماشىلىق ارناعا توعىستىرۋ. فلەشموبتىڭ نەگىزگى مىندەتى – دومبىرانىڭ قوڭىر ءۇنى ارقىلى ۇلتتىق مۇرانى دارىپتەۋ، وسكەلەڭ ۇرپاقتىڭ رۋحىن كوتەرۋ جانە قازاق مادەنيەتىنىڭ كوركەمدىگىن كەڭىنەن تانىتۋ.
جوباعا دايىندىق بىرنەشە اي بۇرىن باستالدى. ارنايى مۋزىكالىق پوپۋرري جاساۋ بارىسىندا ءداستۇردى اۋەندەر مەن زاماناۋي ىرعاقتار ۇشتاستىرىلدى. باعدارلاماعا تولەگەن مۇحامەدجانوۆ پەن التىنبەك قورازبايەۆتىڭ اندەرى، نۇرعيسا تىلەندييەۆتىڭ كۇيلەرى جانە قۇرمانعازىنىڭ ايگىلى «بالبىراۋىن» كۇيى جاڭا وڭدەۋدە ەنگىزىلدى. سونىمەن قاتار، قويىلىمعا زاماناۋي تەحنولوگيا ارقىلى جاساندى ينتەللەكت نەگىزىندە اۆتورلىق بەينەمازمۇن ازىرلەندى.
دايىندىق جۇمىستارى قالا بويىنشا كەڭ اۋقىمدا ءوتتى. 200-دەن استام مەكتەپ پەن قوسىمشا ءبىلىم بەرۋ ۇيىمدارىندا دومبىرا انسامبلدەرى قۇرىلىپ، جوباعا نەگىزىنەن 7–10 سىنىپ وقۋشىلارى قاتىستى. بىرنەشە اپتا بويى مىڭعا جۋىق پەداگوگ 11 500 جاس دومبىراشىنى تاريحي ساحناعا دايىندادى.
فلەشموب بارىسىندا وقۋشىلار ءبىر وركەسترگە بىرىگىپ، ارنايى دايىندالعان مۋزىكالىق تۋىندىنى ءبىر مەزەتتە ورىندادى. مىڭداعان دومبىرانىڭ ءۇنى ءبىر ارنادا ۇندەسىپ، جاس ۇرپاقتىڭ بىرلىگى مەن ونەرگە دەگەن قۇرمەتىن ايقىن كورسەتتى. اۋقىمى، جاس تالانتتاردىڭ شەبەرلىگى جانە ۇلتتىق مادەنيەتكە دەگەن قۇرمەت ۇيلەسكەن بۇل كورىنىس كورەرمەندەر مەن قوناقتارعا ەرەكشە اسەر قالدىردى.
ءىس-شارانىڭ شارىقتاۋ ءساتى — رەكوردتىڭ رەسمي تىركەلۋى بولدى. الماتى قالاسى ءبىلىم باسقارماسىنىڭ باستاماسىن قازاقستان رەكوردتار كىتابى قولدادى. ۇيىمنىڭ باس رەداكتورى قۋانىش ءامىرقۇل ۇلى تازابەكوۆتىڭ اتىنا الدىن الا رەسمي حات جولدانىپ، بارلىق تالاپتىڭ ساقتالۋىن قامتاماسىز ەتۋ ءۇشىن ساراپشىلار ءىس-شاراعا ارنايى قاتىستى.
قازاقستان رەكوردتار كىتابىنىڭ وكىلدەرى قاتىسۋشىلار سانىن ەسەپتەپ، ورىنداۋدىڭ ۇيلەسىمدىلىگى مەن ۇزاقتىعىن (4 مينۋت 38 سەكۋند)، سونداي-اق باعدارلامانىڭ بىرەگەيلىگىن مۇقيات باعالادى. بۇعان دەيىنگى رەكوردتاردان ەرەكشەلىگى، الماتىلىق وقۋشىلار ءبىر عانا كۇي ەمەس، كلاسسيكالىق جانە زاماناۋي شىعارمالاردان قۇرالعان كۇردەلى ءپوپۋرريدى ورىندادى.
فلەشموب سوڭىندا ۇيىمنىڭ باس رەداكتورى ق.ءا. تازابەكوۆ «جاپپاي جەتىستىكتەر» ساناتى بويىنشا جاڭا ۇلتتىق رەكوردتىڭ ورناتىلعانىن رەسمي تۇردە جاريالاپ، الماتى قالاسى اكىمدىگىنىڭ ءبىلىم باسقارماسىنا ارنايى سەرتيفيكاتتى سالتاناتتى تۇردە تابىستادى.
بۇل جەتىستىك بىلتىر تالدىقورعاندا تىركەلگەن (5 000 قاتىسۋشى) كورسەتكىشتەن اسىپ ءتۇسىپ، الماتىنىڭ ۇلتتىق داستۇرلەردى ساقتاۋدا كوشباسشىلىق ۇستانىمىن تاعى ءبىر مارتە دالەلدەدى. بۇعان دەيىنگى رەكوردتار اتىراۋدا (2010 ج. – 1 073 ادام)، ورالدا (2010 ج. – 1 700 ادام) جانە استانادا (2024 ج. – 3 200 ادام) تىركەلگەن بولاتىن. الماتىنىڭ جاڭا كورسەتكىشى الەمدىك گيننەس رەكوردىنا (2010 ج. قىتايدا – 10 450 دومبىراشى) جاقىنداپ، ۇلتتىق مادەنيەتتىڭ الەۋەتىن پاش ەتتى.
«دومبىرا ءۇنى» فلەشموبى اۋقىمدى مادەني شارا عانا ەمەس، ۇرپاقتار ساباقتاستىعىنىڭ ايقىن كورىنىسى، ۇلتتىق قۇندىلىقتاردىڭ ومىرشەڭدىگىن دالەلدەيتىن تاعىلىمدى باستاما. بۇل يگى ءىس جاس بۋىن ءتول مادەنيەتتى ساقتاپ، جالعاستىرا الاتىنىن كورسەتتى. ءىس-شارا سوڭىندا قاتىسۋشىلار ەرەكشە اسەر الىپ، ەل تاريحىنا قوسقان ۇلەسى ءۇشىن ماقتانىش سەزىمىن ارقالاپ تارقاستى.
