الماتىدا جاستار الداعى رەفەرەندۋمدى تالقىلاۋ مەن قولداۋعا بەلسەندى تۇردە كىرىستى. قالادا كونستيتۋسيالىق وزگەرىستەردىڭ ءمانىن تۇسىندىرۋگە جانە جالپىۇلتتىق شەشىم قابىلداۋدا ءار ازاماتتىڭ جەكە قاتىسۋىنىڭ ماڭىزىن ناسيحاتتاۋعا باعىتتالعان كرەاتيۆتى ءارى اعارتۋشىلىق جوبالار قولعا الىندى.
ستۋدەنتتەر، جاس ماماندار، شىعارماشىلىق ورتا وكىلدەرى مەن ەرىكتىلەر الەۋمەتتىك جەلىلەردە بەينەروليكتەر جاريالاپ، فلەشموبتار مەن پىكىرتالاستار ۇيىمداستىرىپ جاتىر. سونىمەن قاتار وفلاين فورماتتا دا كەزدەسۋلەر مەن اشىق الاڭدار وتۋدە. بۇل شارالاردا جاڭا كونستيتۋسيا جوباسىنىڭ نەگىزگى قاعيدالارى قاراپايىم ءارى تۇسىنىكتى تىلدە ءتۇسىندىرىلىپ، اشىق ديالوگ پەن سانالى تاڭداۋ مادەنيەتىنە باسىمدىق بەرىلەدى.
قاتىسۋشىلاردىڭ ايتۋىنشا، باستامالاردىڭ فورماتى جاستار اۋديتورياسىنا بارىنشا جاقىن. قىسقا بەينەلەر، پودكاستتار، جاساندى ينتەللەكت نەگىزىندەگى كونتەنت، كوشە اكسيالارى جانە بلوگەرلەر مەن قوعامدىق پىكىر كوشباسشىلارىمەن بىرلەسكەن جوبالار كەڭىنەن قولدانىلۋدا. مۇنداي ءتاسىل اقپارات تاراتۋمەن قاتار ازاماتتىق جاۋاپكەرشىلىك مادەنيەتىن نىعايتۋعا ىقپال ەتەدى.
جاستار رەفەرەندۋمدى كوزقاراسىن تىكەلەي بىلدىرۋگە ءارى ەل بولاشاعىنا اسەر ەتۋگە مۇمكىندىك بەرەتىن ماڭىزدى قادام رەتىندە باعالايدى. ولاردىڭ بەلسەندىلىگى قوعامدىق ۇدەرىستەرگە قاتىسۋعا دايىن ەكەنىن جانە مەملەكەت دامۋىنا جاۋاپكەرشىلىكپەن قارايتىنىن كورسەتەدى.
اتالعان باستامالار داۋىس بەرۋ كۇنىنە دەيىن جالعاسىپ، ونلاين پلاتفورمالار مەن قالالىق قوعامدىق كەڭىستىكتەردى قامتي وتىرىپ، جاستاردىڭ اشىق ءارى سىندارلى تالقىلاۋعا كەڭىنەن قاتىسۋىنا جول اشادى.
