ۋكرايناداعى  سوڭعى وقيعالار  ەلىنىڭ توز-توزىن شىعارۋدا. ساياسي ساناسى تاياز وپپوزيسيا مەن اسىرە ەۆروپاشىلدىق، ۇلتشىلدىق ۋكراينانى ۇشكە ءبولدى. ال ورىس ءتىلدى حالىق باسىم تۇراتىن شىعىس وبلىستار دا ۋكرايندەردىڭ بۇل الاۋزدىعىن كەشىرمەۋدە. ونسىزدا رەسەيدىڭ ىقپالىمەن كەۋدەسىنە نان پىسكەن ورىس ۇلتشىلدارى ۋكارينا بيلىگىنە اشىق قارسىلىققا شىقتى. وعان ۋكراينانىڭ جاڭا بيلىگىنە قارسىلار مەن «ەۆرومايداندى» قولدامايتىن توپتار دا قوسىلدى. تىپتەن ورىستار قىرىم اۆتونوميالى رەسپۋبليكاسىنىڭ ۇكىمەتى مەن ۇلتتىق كەڭەسكە تۋلارىن ءىلىپ تاستادى. ەگەر ايتىلمىش، دەموكراتيانىڭ زاڭدىلىعىنا جۇگىنسەك، الدا بولاتىن رەفەرەندۋمدا ورىس حالقى 58 پايىزىن ۇستايتىن قىرىم ۋكارينادان تاۋەلسىزدىك الۋى مۇمكىن. تىپتەن بىردەن روسسيانىڭ قۇرامىنا كىرەدى. بۇل ورىستار مەن ورىس تىلدىلەر باسىم كوبىن ۇستايتىن قازاقستاننىڭ سولتۇستىك وبلىستارىن دا قاعىس قالدىرماۋى مۇمكىن. ونسىزدا ورىس دەپۋتاتتارى مەن ورىس ۇلتشىلدارى رەسەيدە اشىق مالىمدەمەلەر جاساپ، قازاقستاننىڭ سولتۇستىك وبلىستارىن وزدەرىنە قوسىپ الۋعا تالپىنىپ جاتىر. ەگەر سولتۇستىك وبىلىستارىمىزدا شوشاڭ ەتىپ ءبىر توپ ورىس كوشەگە جينالىپ، ۇكىمەتتىڭ الەۋمەتتىك جاقتان قيناپ وىرعاندارىن العا تارتىپ ەرەۋىلگە شىعا قالسا بولدى. شەكارانىڭ ار جاعىندا اڭدىپ وتىرعان ورىستار ەش قيىندىقسىز قاپتاپ كەلىپ، قولداپ، شۋدى ءبىراق شىعارادى. ول كەزدە بيلىك جاڭاوزەندەگىدەي وق شىعارعاندى قويىپ، داۋىس كوتەرىپ تە سويلەي المايتىن بولادى. ودان قۇتىلۋدىڭ جالعىز جولى، ەلباسىمىز باسشىلىعىندا قولعا الىنعان "نۇرلى كوشتىڭ" بۇيداسىن سولتۇستىك وبلىستارعا اپارىپ ءبىراق بايلاۋ. قانداستار تۋرالى جاڭا قاۋلى شىعارىپ، كەشەندى تۇردە جۇمىس جاساۋ كەرەك.

بەيسەن احمەت