بىرنەشە جىلدان بەرى «قازاقستان»، «حابار»، «تاڭ» تەلەارنالارىنان «التىن تاعا»، «بينگو»، «سۋپەر لوتو» لوتەرەيالىق ويىندارى ۇزدىكسىز ويناتىلىپ، كورسەتىلىپ كەلەدى. سوڭعى كەزدە قاراپايىم حالىقتىڭ لوتەرەيا ويىندارىنا دەگەن قىزىعۋشىلىعى ارتقان. تۇراقتى تۇردە ويناپ، ءبىراز قارجىسىن وسىعان جۇمساپ جۇرگەن ازاماتتارىمىز جەتەرلىك ەكەن. ماسەلەن، ءار سەنبى كۇنى تەرمينال ارقىلى بىرنەشە لوتەرەيا ساتىپ الىپ جۇرگەن جىگىتتى سىرتىنان ۇنەمى بايقاپ جۇرەتىنمىن. جاسى وتىزدان اسقان جاس جىگىتپەن اڭگىمەلەسۋدىڭ ءساتى ءتۇستى.

–ءاتى-جونىم – تەمىر حاسەنوۆ، جاسىم 32-دە. لوتەرەيانىڭ تۇرلەرى كوپ. مەن كەزىندە بارلىق لوتەرەيا ويىندارىن ويناعانمىن. ءقازىر تەك «سۋپەر لوتو» دەگەن ءبىر ءتۇرىن ساتىپ الىپ ءجۇرمىن. بۇل ويىن باسقالارعا قاراعاندا وزىندىك ەرەكشەلىگىمەن قىزىق. ماسەلەن، «سۋپەر لوتونىڭ» 6/35، 5/36 جانە 5/30 دەگەن ءۇش ءتۇرى بار. سونىڭ ىشىندە 6/35 دەگەن ويىننىڭ دجەك-پوتتىق ۇتىس كولەمى قوماقتى. «سۋپەر لوتومەن» ويناعانىما 4 جىل بولدى. الايدا ءالى كۇنگە شەيىن دجەك-پوت ۇتقان جوقپىن. جىلقى جىلى قازاققا تابىستى جىل دەپ جاتادى عوي، سوندىقتان بيىل باس بايگەنى ۇتىپ قالارمىن دەپ ۇمىتتەنەمىن. قۇداي بۇيىرتسا، ەگەر وسىنداي ساتتىلىك كەلسە نەسيەلەرىمدى جاۋىپ، ءۇي سالۋدى ءجون كورىپ وتىرمىن. ءيا، راسىندا دا تەمىر سياقتىلار ارامىزدا كوپ. ءبىر قىزىعى، لوتەرەيا ويىن­دارىنا وزگە ۇلتتىڭ قارتتارى كوبىرەك قىزىعادى. ماسەلەن، 2010 جىلى «سۋپەر لوتونىڭ» كەزەكتى ويىنىندا الماتى قالاسىنىڭ ءبىر قارت تۇرعىنى 155 ميلليون 791 مىڭ 260 تەڭگە كولەمىندەگى دجەك-پوتتىق ۇتىستىڭ يەگەرى اتانىپتى. تەرمينالعا كەلىپ ساتىپ العان بيلەتتەرىن تەكسەرىپ قانا قويماي، جاڭادان بيلەت الىپ جاتقان جاسى سەكسەنگە تاياپ قالعان ورىس كەمپىرىمەن تىلدەسۋدىڭ ءساتى ءتۇستى. – ەسىمىم – اناستاسيا ۆەرەشنيكوۆا. بۇل ويىندى ەرمەك ءۇشىن وينايمىن. ەشقانداي ماتەريالدىق قيىنشىلىققا تاپ بولعان جوقپىن. 60000 تەڭگە كولەمىندە زەينەتاقى الامىن. ءبىر قىزىم گەرمانيادا تۇرادى، ال ەكىنشى قىزىم بانك سالاسىندا جۇمىس ىستەيدى. كىشى قىزىم مارينا ماعان وسى ويىندى ويناۋدى ۇيرەتتى. ءبىر بايقاعانىم «سۋپەر لوتودا» ساتتىلىكتى ادام ءوز قولىمەن جاسايدى ەكەن. ويتكەنى باقىتتى 6 ساندى تاۋىپ الۋ ءوز قولىڭىزدا ەكەنىن ۇمىتپاعانىڭىز ءجون. الاتىن زەينەتاقىمنىڭ 10 پايىزىن لوتەرەيا ويناۋعا ارنايمىن. كەلەشەكتە دجەك-پوت ۇتىپ السام، جينالعان سومانىڭ كوبىن دەپوزيتكە سالۋدى كوزدەپ وتىرمىن. شەتەلگە شىعىپ قىدىرۋدى دا ءجون سانايمىن. شىندىعىندا دا، بۇل ويلاناتىن نارسە ەكەن. لوتەرەيانى تۇراقتى وينايتىن ادامداردىڭ كوكسەگەنى قايتكەن كۇندە دە دجەك-پوت ۇتىپ الۋ ەكەندىگى بەلگىلى. ەگەر ويىنشىنىڭ ارمانى ورىندالسا، جەڭىپ العان سوماسىن قايدا جۇمسايتىنىنىڭ ءوزى جۇمباق بولىپ كەلەتىنى جاسىرىن ەمەس. ايتسە دە، قاراكوز قانداستارىمىزدىڭ ارمانى ورىندالسا كوبىسى نەسيە جابۋدى، ءۇي سالۋدى نە بولماسا توي جاساۋعا جۇمسايتىنى انىق. ءبىر بايقاعانىم، وزگە ۇلت وكىلدەرىنىڭ كوكسەگەنى باسقاشا بولىپ شىقتى. ولاردىڭ دەنى دەپوزيتكە سالۋدى كوزدەيدى. ەلىمىزدە «سۋپەر لوتو» ويىنىنا قۇمارتقان ازاماتتاردىڭ سانىنىڭ ارتۋى­نا دا سەبەپ جوق ەمەس. بىرىنشىدەن، بۇل لوتەرەيادا ادام ءوزىنىڭ ساتتىلىگىن ءوزى جاساپ الادى دەيدى ماماندار. ەكىنشىدەن، 2009 جىلى جارىققا شىققان «سۋپەر­ لوتو» ساتىپ الۋشىلارعا ءتيىمدى بولىپ وتىر. قازىرگى كۇندە ەلىمىزدىڭ 15 قالاسىندا 1300 تەرمينال حالىققا قىزمەت ەتەدى ەكەن. اسىرەسە، بۇل لوتەرەيا ءتۇرىن الماتى، استانا، قاراعاندى، شىمكەنت، اقتوبە قالالارىنىڭ تۇرعىندارى وتە كوپ وينايتىنى انىقتالدى. دجەك-پوتتى جەڭىپ الىپ، قوماقتى قارجىعا يە بولىپ جاتقاندار دا وسى قالادان ءجيى كەزدەسەدى. ۇشىنشىدەن، جارناماسى وتە مىقتى. «باقىتقا كەنەلگەن» ادامداردىڭ قانشا اقشا ۇتىپ العاندىعى جونىندە جارنامالار بەرىلەدى. ايتسە دە، ۇتىسقا كەنەلگەن ادامنىڭ اتىن كومپانيا وكىلدەرى جاسىرىن تۇردە ۇستايدى ەكەن. ءتىپتى تاياۋدا عانا ەلىمىزدە بىرنەشە ادام تەڭگە بويىنشا ميلليونەر اتانىپ ۇلگەرىپتى. ماسەلەن، وتكەن قاڭتار ايىندا الماتىنىڭ ءبىر تۇرعىنى 2 963 440 تەڭگە ۇتىپ الىپتى. ال بىلتىرعى جىلدىڭ قازان ايىندا استانانىڭ ءبىر تۇرعىنى 87 795 175 تەڭگەنى قۇرايتىن ەڭ باستى 1-دارەجە بويىنشا دجەك-پوتتىق ۇتىستىڭ يەگەرى اتاندى. جالپى، بۇل لوتەرەيادا اكسيا ويىندارى ءجيى ۇيىمداستىرىلادى. سوندىقتان ويىنشىلاردىڭ سانى جىلدان-جىلعا ارتىپ كەلەدى. «سۋپەر بينگو» ويناپ بايىعان ازاماتتار دا جوق ەمەس. بۇل لوتەرەيادا ۇتىس سومماسى بىرنەشە مارتە كوبەيتىلگەن ستاۆكا بويىنشا شەشىلەدى. سوندىقتان تاۋەكەلدىلىكتەن جۇرەكسىنبەي ويناپ ءارى باعىڭىز اشىلسا، اياق استىنان اقشالى بولۋىڭىز عاجاپ ەمەس. «التىن تاعا»، «قازلوتو» جانە ت.ب. لوتەرەيا تۇرلەرىنە ءۇمىت ارتىپ وينايتىندار جەتەرلىك. بۇل لوتەرەيالار بويىنشا دا قوماقتى قارجىعا كەنەلگەندەر بارشىلىق. ايتسە دە، مول قارجىعا كەنەلگەندەر ساۋساقپەن سانارلىقتاي بولاتىنى جاسىرىن ەمەس. سوندىقتان لوتەرەيانى ويناعان ادامداردىڭ كوبىسى ۇتىلادى. لوتەرەيانى تۇراقتى تۇردە ويناعان ادامدا لۋدومانيا، ياعني ويىنعا تاۋەلدىلىك اۋرۋى پايدا بولادى. وسىدان-اق ادامنىڭ جۇيكەسىنە كۇش تۇسەتىنى بەلگىلى. ويىننىڭ اتى – ويىن. كەيدە ۇتادى، كو­ءبى­­نە ۇتىلادى. مۇنداي كەزدە ادامنىڭ ءجۇي­كە جۇيەسى بۇزىلىپ، اشۋ-ىزاعا جول بەرەدى. نەگىزىنەن، ويىنعا قۇ­مار ادام­داردى ەكى توپقا بولۋگە بولادى: ءبى­ءرىن­­ءشىسى – قوعامنىڭ الەۋمەتتىك قورعال­ما­عان كە­دەي توبىنان شىققاندار، ولار ءۇل­كەن ۇتىس­­قا قول جەتكىزىپ، بايلىققا بىردەن كەنەلگىسى كەلەدى. ەكىنشىلەرى – شەندى-شەك­­­پەندى، اقشاسىن قايدا جۇمسارىن ءبىل­مەي، ەرىككەن بايلار. ولار ۋاقىت ولتىرەمىن دەپ ءجۇرىپ، ويىنعا قۇمارلانىپ، «اۋرۋلار» قا­تا­رىنا قوسىلادى. سوندىقتان لوتەرەيا ويىنشىسى بول­ساڭىز، شەكتەن اسىرماي از وينا­عانىڭىز دۇرىس. ۇتىسقا كەنەلمەسەڭىز تاۋىڭىز شا­عىلماسىن. ويتكەنى ءساتسىز­دىكتەردىڭ ءوزى اينالىپ كەلىپ ءبىر كۇنى ساتتىلىككە الىپ كەلەدى ەمەس پە؟! ءۇمىتسىز شايتان دەگەن عوي. ەشقاشان دا ءۇمىتىڭىز ۇزىلمەسىن. بالكىم ءبىر كۇنى ءسىز دە قالتالى ازاماتتاردىڭ بىرىنە اينالىپ قالارسىز.

سالتانات جاسباتىر قىزى