Buryn qazaq saýdagerleri qytaılyq ónimdi Qyrǵyzstan bazarlarynan satyp alyp, elge ákeletin. Qara bazar jıyrma jylǵa jýyq ýaqyt Qyrǵyzstannan tasylatyn taýarmen kún kórip keldi. Eldegi devalvasıa saldarynan endigi jaǵdaı kerisinshe órbýde. Qyrǵyzdardyń Almaty naryǵyna aǵylýy jańa jyldan soń bastalǵan. Aıyr qalpaqtylar bizdegi quny tómen taýarǵa qyzyǵyp, ónimderimizdi ózderine jappaı tasyp jatyr. Bul túsinikti de. Óıtkeni qazir Qyrǵyzstanda gaz ben benzın quny bizdegiden áldeqaıda qymbat. Kórshilerimiz sońǵy jarty jyldyń ózinde 250 mln teńgege eksport jasaǵan, - dep habarlaıdy Almaty telearnasy.

"Qyrǵyz eli Eýrazıalyq ekonomıkalyq odaqqa kirgeli 307 habarlama túsken. Bul eksportqa qatysty túsken habarlamalardyń sany. Jalpy 84 salyq tóleýshi Almaty qalasynda tirkelgen. Olar 54,5 mıllıon somǵa eksport jasaǵan. Bul teńgemen shaqqanda 250 mıllıon teńge",- dedi Almaty qalasy Memlekettik kirister departamentiniń bólim basshysy Edil Ázimshaıyq.

İrgeles elge negizinen turmystyq tehnıka, un ónimderi men jumyrtqa syndy taýar túrleri eksporttalyp jatyr. Máselen, qazaq uny sapaly ári ár kelisi 5-10 somǵa arzan. Buryn Bishkektegi bazarlar Orta Azıadaǵy eń arzan saýda ortalyqtary bolsa, qazir ımporttyń artýy bul óńirge jaısyz tıip, taýar aınalymyn turalatyp tur. Biraq sarapshylar kórshi el turǵyndarynyń qajetin Qazaqstannan izdeýi uzaqqa sozylmaıdy dep sanaıdy.

"Turmystyq tehnıkalar men qurylys zattaryn satyp alý jańa jyldan beri jaqsy júrip jatyr. Biraq ol kóp ýaqytqa sozylmaıdy. Qyrǵyzdardyń Qazaqstannan bundaı zattardy jappaı satyp alýy ary ketse eki-úsh aıǵa sozylady. Olardyń bizge kelýi Qazaqstan naryǵyna erekshe serpin bermeıdi. Bizdegi baǵanyń ósýine de ózgeris ákelmeıdi. Óıtkeni ol jaqtaǵy tutynýshylar sany az. Ári olardyń jeńil ónerkásibi bizben salystyrǵanda jaqsy damyǵan",- dedi Gennadıı Shestakov.

Qyrǵyzstan ulttyq statısıka komıtetiniń dereginshe, ótken jyly respýblıka 1,3 mıllıard dollardyń ónimin eksportqa shyǵaryp, 3,7 mıllıard dollardyń taýaryn syrttan ákelgen. Qyrǵyz sarapshylary "Úkimet dollardy erkine jibereıin dese, búdjet qyzmetkerleri qınalyp, syrtqy qaryz ósedi. Dollar baǵamyn ustaıyn dese, óndiris zardap shegedi" deıdi. Qyrǵyzstan Eýrazıalyq ekonomıkalyq odaqtyń tutynýshy eline aınalmaýy úshin qazir óz naryǵy men kásipkerlerin qorǵaýdyń jańa jolyn jantalasa qarastyryp jatyr.