Qytaı sekildi jan sany kóp elde qoǵam tynyshtyǵyn saqtap, saqshy (polısıa) bolyp qyzmet etý úlken jaýapkershilikti qajet etedi. Osyndaı talaby joǵary, qaýip-qateri mol qyzmetti arqalap júrgenderdiń qatarynda qara kóz qazaq qyzy Taslıma da bar, - dep habarlaıdy «Qamshy» portaly "Suraq-jaýap" saıtyna silteme jasap.

Taslıma Dáýletqyzy 2010 jyly arnaıy emtıhannan ótip, Shyńjań qoǵam qaýipsizdik mekemesi erekshe saqshy bas bólimshesine qabyldanady.

Onda japa-mashaqatqa toly 3 jyldyq jumysty sátimen aıaqtap, 2013 jyly Úrimji qalalyq qoǵam qaýipsizdik departamenti Saıbaq raıonyna qarasty Hotan kóshesinde áleýmettik halyq saqshysy qyzmetine aýysady. Qazirgi kúni sonda eńbek etip júr.

Jaqynda «Juńgo qazaq radıo toraby» Taslımamen arnaıy suhbat jasady. Óıtkeni, polısıa qyzdyń qýanyshty jańalyǵy bar. Bıylǵy jyl bastala sala, Qytaı eli 13 qysqy sport jarysyn ótkizgeni belgili. 4 jylda bir bolatyn osy aýqymdy sport dodasy tuńǵysh ret Shyńjańda, onyń ishinde Úrimji qalasynda boldy.

Mine, 15 kúnge sozylǵan memlekettik deńgeıdegi úlken aýqymdy sharada qaýipsizdikti qamtamasyz etý úshin, tikesinen tik turyp qyzmet etken polısıa ókilderiniń eńbegi orasan. Al olardyń qatarynan oza shyǵyp, atqarǵan qyzmetimen kózge túsý odan da abyroıly.

Sol abyroıly mindetti oıdaǵydaı oryndap, shynaıy, adal eńbegi basshylyq tarapynan joǵary baǵalanǵan úzdik polısıa — Taslıma Dáýletqyzy. Úrimji qalalyq qoǵam qaýipsizdik departamenti ony «qoǵam amandyǵyn qorǵaýdaǵy úzdik polısıa qyzmetkeri» ataǵymen marapattady.

Bul Taslımanyń alǵashqy tabysy emes. Quqyq qorǵaý mekemesinde jumys atqaryp kele jatqan alty jyldan beri qarapaıym halyqtyń alqaýyna bólenip, ujymnyń maqtanyshy, óz isiniń kásibı mamany bolǵan qandasymyz talaı ret syılanyp, qatty eńbeginiń tátti jemisin tatyp kele jatyr.