Oral qalayndaǵy iri saýda ortalyqtarynyń birindegi dárethana ishine qoıylǵan beınekamera jurtshylyqtyń narazylyǵyn týǵyzýda, - dep habarlaıdy «Qamshy» portaly Tengrinews.kz-ke sileme jasap.

Beınequrylǵy dárethana ishindegi pıssýarlardyń dál ústine ornatylǵan kórinedi. Adam quqyǵyn qorǵaý jónindegi búronyń osy oblystaǵy ókili Pavel Kochetkov bul árekettiń zańǵa tompaq keletinin aıtyp otyr.

«Bul adam quqyǵyn týra maǵynasynda aıaqqa taptaý. QR Qylmystyq kodeksinde 147-bap bar. Sol bap osy quqyqty qorǵaıdy. Sonymen qatar, Qazaqstan azamattarynyń jeke ómiriniń qaýipsizdigi men qol suǵylmaýshylyǵyna kepildik beretin qanshama halyqaralyq zańdar men paktiler bar. Beınejazba qandaı maqsatpen júrgiziletini belgisiz ǵoı. Onyń ústine kim bireýdiń óziniń dáretke otyrǵanyn kórgenin qalaıdy?», - deıdi zańger.

Al, saýda ortalyǵynyń ákimshiligi beınekameranyń lańkestik áreketterdiń aldyn alý úshin qoıylǵanyn aıtyp aqtalýda.

«Bizdiń saýda ortalyǵynyń aınalasy tolyq beınebaqylaý júıesimen jabdyqtalǵan. Bul lańkestik áreketter oryn almas úshin kerek. Ondaı jaǵdaıdan eshkim qorǵalmaǵan. Biz bul máselede halyqaralyq tájirıbege júginemiz. Kameralardyń ornalasýy ishki ister organdarymen kelisilgen, eshqandaı zań buzýshylyq joq», - deıdi CityCenter saýda ortalyǵynyń qaýipsizdik qyzmetindegiler. Olardyń aıtýynsha, beınekamera dárethanaǵa kireberis esikke baǵyttalǵan kórinedi.