Astanada jaýyzdyqpen óltirilgen stýdent Erasyl Áýbákirov ólimine qatysy bar dep qamaýǵa alynǵan kúdiktilerdiń biri ǵalamtordan oqqaǵardyń juymysyn izdegen, - dep habarlaıdy «Qamshy» portaly YK-news.kz-ke silteme jasap.

Qylmystyq iske qatysty qamaýǵa alynǵan Vıtalıı Sherstenev Astanada turǵanymen Ońtústik Qazaqstan oblysynyń týmasy kórinedi. 28 jastaǵy kúdikti qurylys kompanıalarynyń birinde júrgizýshi bolyp jumys istegen. Qaıǵyly oqıǵadan buryn ol jumysynan shyǵyp ketken. V. Sherstenevti tutqyndaý týraly sot qaýlysynda ol jumyssyz retinde kórsetilgen.

Alaıda, onyń OLH.kz saıty arqyly jumys izdegeni belgili bolyp otyr. Saıtqa bergen habarlandyrýynda ol óziniń oqqaǵar («telohranıtel») retinde nemese júrgizýshi bolyp jumysqa ornalasýǵa ázir ekenin jazǵan. Jarnama avtory óziniń dene sıpattary men tózimdiligin aıtyp, premer-klastaǵy kólikter aıdaǵanyn alǵa tartqan.

Sondaı-aq, ol úıge baryp massaj jasaıtyn da «óneri» baryn eskertken kórinedi. 

Osy jerde E. Áýbákirov ólimine qatysty tutqyndalǵan taǵy bir kúdikti 31 jastaǵy Andreı Tıhonenko da jumyssyz ekenin aıta ketý kerek. Alaıda, keı aqparat quraldary ol V. Sherstenev ekeýi osy istegi úshinshi kúdikti Aıan Meıirbaevtyń kúzetshileri qyzmetin atqardy degen de aqparat taratýda.

Esterińizge salsaq, 10 aqpan kúni Astana qalasynyń syrtynan azaptap óltirilgen stýdent Erasyl Áýbákirovtiń múrdesi tabyldy. Marqumdy azaptap jatqan sát túsirilgen vıdeo da áleýmettik jelilerde taratyldy.