10 aqpan kúni Astana qalasynda azaptap óltirilgen stýdent Erasyl Áýbákirovtiń múrdesi tabyldy. Oqıǵaǵa qatysy bar degen tórt kúdikti qamaýǵa alynyp, tergeý bastaldy. İshki ister organdary bolǵan qylmystyń jaı-japsary men oǵan sebep bolatyn jáıtterdi tergeý qupıasyna baılanysty jarıalamaı otyr. Soǵan qaramastan áleýmettik jelide tam-tumdap bolsa da oqıǵaǵa qatysty boljamdar aıtylýda. Solardyń ishindegi mańyzdysy áleýmettik jeli men aqparat quraldaryn shýlatqan vıdeo boldy.
Oqıǵaǵa baılanysty pikirlerdiń ishinde erekshe atap óterligi ony ótken jyldyń basty qylmystyq oqıǵasynyń biri bolǵan Álibı Jumaǵulovqa qatysty iske uqsatý bolyp otyr. 365info.kz saıty osy eki istiń arasyna ózinshe paralel júrgizgen eken. Onda ótken jylǵy Álibı Jumaǵulovtyń aıaýsyz soqqyǵa jyǵylýy men Erasyl Áýbákirovtiń azaptap óltirilýi arasyndaǵy biraz uqsastyqtar anyqtalǵan.
Eki oqıǵaǵa da ortaq basty uqsastyq – jaýyzdyq. Eki oqıǵada da qylmyskerler adam tózgisiz jaýyzdyqqa barǵan. Ekinshi uqsastyq retinde oqıǵaǵa qaltaly, yqpaldy azamattardyń qatysty bolýyn aıtýǵa bolady. Birinshi oqıǵadaǵy qaltaly azamat – Qaırat Jamalıev, ekinshisinde – óskemendik kásipker Esen Meıirbaev.
Eki oqıǵada da qylmystyq áreket orny retinde bólek ornalasqan turǵyn úı tańdap alynǵan.
Erasyl da Álibı de qylmyskerlermen kezdesýge ózi barǵan jáne ol týraly eshkimge eskertpegen. Álibıdiń qylmys ornyna óz aıaǵymen barǵany basy ashyq másele. Al, Erasyl Áýbákirovtiń oqıǵa ornyna qalaı jetkeni ázirge boljam kúıinde ǵana. Biraq, eki jigit te kezdesýge keshki mezgilde shaqyrylǵan. Iaǵnı, ol kezdesýdiń anaý aıtqandaı «jyly júzdesý» bolmaıtynyn túsiný qıyn emes edi. soǵan qaramastan olar, kezdesýge jaqyndaryn eskertpeı barǵan.
Eki oqıǵadaǵy jábirlenýshilerdiń de jas shamalary birdeı. Álibı ol kezde 24 jasta bolsa, Erasyl 23 jasta edi. Eki jigit te uıymdasqan toptyń shabýylyna tap boldy. Álibıdi astanalyq kásipker Qaırat Jamalıev pen onyń sybaılastary soqqyǵa jyqsa, Erasyldy kemi úsh jigit jabylyp óltirgen.
Eki oqıǵada da qylmystyq áreketter vıdeoǵa jazylǵan. Álibı oqıǵasynda vıdeoǵa túsirýshiler onyń áldebir qylmysty jasaǵan moıyndaýyn túsirse, Erasyldyń azaptalýy vıdeo avtory Nurbek Ájimbaıdyń aıtýynsha, kezdeısoq túsirilgen. Bul vıdeoǵa qatysty naqty sheshim áli shyqqan joq.
Erasyldyń joǵalýy men Álibıdiń soqqyǵa jyǵylýy áleýmettik jelide jarıalanyp, qyzý talqylandy.
Eki oqıǵanyń negizgi uqsastyqtary – osylar. Al, aıyrmashylyǵy birinde jábirlenýshi soqqyǵa jyǵylǵanymen jany aman qaldy, ekinshisinde jábirlenýshi qaza tapty. Sońǵy oqıǵaǵa qatysy bar degen 4 kúdikti qazir qamaýǵa alyndy.
Jomart Abdollauly
