Búgin Qarýly kúshterdiń «Ońtústik» óńirlik qolbasshylyǵynda Ońtústik Qazaqstan, Jambyl jáne Qyzylorda oblystarynyń aýmaǵynda ornalasqan áskerlerdiń jaýyngerlik ázirligin kenetten tekserýdiń birinshi kezeńi bastaldy, - dep habarlaıdy «Qamshy» portaly Qorǵanys mınıstrliginiń baspasóz qyzmetine silteme jasap.

«Ońtústik» óńirlik qolbasshylyǵynyń bólimderi men Qyzylorda oblysynyń Qorǵanys isteri jónindegi departamenti dabyl boıynsha kóterildi.

Áskerler oqý-jattyǵý tapsyrmalaryn pysyqtap, oqý-jattyǵý polıgondaryna shyǵa otyryp, 5 shaqyrym qashyqtyqqa quramdastyrylǵan tásilmen marsh jasady. 

Tarazdan Otarǵa shamamen 160 birlik tehnıka jiberildi. Sondaı-aq Lýgovoı stansıasynan Otarǵa deıin artılerıalyq eshelondardy tıeý júrgizildi. Munda jaýyngerlik oq atýlar ótkiziledi. Qyzylordada dabyl boıynsha Qyzylorda oblysynyń Qorǵanys isteri jónindegi departamenti, qalanyń qorǵanys isteri jónindegi basqarmasy jáne oblystyń qorǵanys isteri jónindegi bólimderi kóterildi. Alynǵan belgige sáıkes, shtab jáne quqyq qorǵaý, arnaıy organdardyń qyzmetkerleri, sondaı-aq Qazaqtelekom men Qyzylorda oblysynyń jergilikti atqarý organdarynyń qyzmetkerleri habardar etildi. Al jańadan qurylǵan arnaıy maqsattaǵy bólimshe oqý-jaýyngerlik tapsyrmalardly oryndaý kezinde is-qımyldardyń úılesimdiligin pysyqtady.

Tekseris sheńberinde áskerlerdi tańsyq polıgondarǵa jóneltý júzege asyryldy. Bul jerlerde jaqyn kúnderi oqý-jattyǵýlardyń belsendi fazasy bastalady. 

Tekseristiń negizgi maqsaty qoıylǵan jaýyngerlik tapsyrmalardy oryndaý kezinde bólimshelerdiń is-qımyldarynyń úılesimdiligin baǵalaý bolyp tabylady. Jaýyngerlik ázirlikti tosynnan tekserý búgingi kúni Qarýly Kúshterdiń shynaıy jaýyngerlik ázirligin aıqyndaýdyń pármendi ári batymdy tásilderiniń biri, sondaı-aq áskerlerdegi isterdiń shynaıy jaı-kúıin zerdeleýdiń mańyzdy úlgisi bolyp tabylatynyn aıta keteıik.