Memleket basshysy Nursultan Nazarbaev búgin Almatyda ótken jıynda qala basshylyǵyna Almatynyń ekologıasyn jaqsartýdy tapsyrdy, - dep habarlaıdy QazAqparat.

«Býtakovkada úı salyp tastaǵan. Shymbulaqqa baratyn aspaly jol ne úshin salyndy? Sol jerge mashınamen jetýge me? Eýropalyq taý shańǵysy kýrorttarynda kólik kórdińizder me? Myna qarqynmen ormandy joıyp tynamyz», - dedi N.Nazarbaev. 
Memleket basshysy qala ákimine tyıym salynǵan jerlerge úı salǵandardy oılanbastan súrip tastaý kerektigin aıtty. 
«Ál-Farabıdan joǵary úı salmaýdy tapsyrdym. Sonda da salynyp tastalǵan. Qala taýdan keletin samaldyń arqasynda demalyp otyr. Taýdy da jaýyp tastapsyńdar», - dedi Prezıdent. 
Sonymen qatar, Elbasy Almatynyń tazalyǵy týraly aıtty. 
«Bul - barlyq qazaqstandyqtardyń súıikti qalasy. Kóriktendirý, tazalyq, aryq júıesiniń abattandyrylýyn qadaǵalaý kerek. Qalanyń qojaıyny retinde úıińdi qaraǵandaı qaraý kerek. Basshylyq meniń eskertpelerimnen nátıje shyǵarady dep úmittenemin», - dedi N.Nazarbaev.