Qazaq tili

Ǵundarǵa daǵy,

saqtarǵa daǵy,

aq sútin bergen arman til,

atqanda daǵy,

shapqanda daǵy

qansyrap aman qalǵan til.

Jońǵardyń susy,

shúrshittiń mysy

eńsesin basa almaǵan,

júregin shoqyp qyrsyqtyń qusy

sońynan qalmaı sarnaǵan.

Órt shalǵan týdaı jaraly tilim,

jelbirep jelmen shalqydyń,

qaq jaryp shyǵyp

dalanyń túnin,

jýsan men qymyz ańqydyń.

Farabıler men Beıbarystardyń

ósıeti de ózińde,

Mahambet syndy jolbarystardyń

qasıeti bar sózińde.

Babalar ózi baıytqan tilim:

«shubarladyń dep sen meni»,

buıyrar boldyń aıypqa búgin,

paryqsyz bizdeı pendeńdi.

Qaıǵyǵa qalaı baýyr baspaıyn,

erterek týyp,

kesh qalsam

kúlkimdi muńǵa aıyrbastaımyn,

ana tilimdi eske alsam.

«Quryǵan til!» – dep tabandaǵannyń,

deımisiń ketpes túgi de,

tilimdi sonsha jamandaǵannyń

shoq túser áli tiline.

Ulyqbek Esdáýlet