Búgin Ulttyq ulannyń Shymkent qalasyndaǵy 6506 áskerı bóliminde Ulttyq ulan óńirlik qolbasshylyqtarynyń, óńirlik qolbasshylyqtar áskerı  polısıasynyń, Áskerı ınstıtýttyń tárbıe jáne áleýmettik-quqyqtyq jumystar jónindegi basqarma jáne bólim bastyqtarymen, «Búrkit» arnaıy maqsattaǵy bólinisteri men áskerı bólimder komandırleriniń tárbıe jáne áleýmettik-quqyqtyq jumystar jónindegi orynbasarlarymen, sonymen qatar Ulttyq ulan áskerı bólimderiniń  áskerı polısıa bólimsheleri men qyzmet bastyqtarymen respýblıkalyq oqý-ádistemelik jıyn bastaldy, - dep habarlaıdy «Qamshy» portaly Ulttyq ulannyń «Ońtústik» óńirlik qolbasshylyǵy baspasóz qyzmetine silteme jasap.

Jıynnyń alǵashqy kúni tárbıeshi ofıserlerdińi basshylyq qujattardy bilý deńgeıi men memlekettik tildi meńgerýi boıynsha synaqtar tapsyrýdan bastady. Synaqtama aıaqtalǵan soń oqý-ádistemelik jıyn jetekshisi Qazaqstan Respýblıkasy Ulttyq  ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Muhametqalı Satov elimizdegi qazirgi qoǵamdyq-saıası ahýaldy zerdeleı kele, ótken 2015 jyly tárbıe, zańdylyq, quqyqtyq tártip, qoǵamdyq qaýipsizdik boıynsha Ulttyq ulandaǵy atqarylǵan barsha is-sharalardy saralap qorytyndylady, sondaı-aq 2016 jyly tárbıe jáne áleýmettik-quqyqtyq jumystar qurylymy men áskerı polısıa organdaryna júkteletin mindetterdi atap ótip, aldaǵy bolatyn Qazaqstan Respýblıkasynyń Májilis Parlamenti jáne barlyq deńgeıdegi máslıhat depýtattary saılaýynyń ózektiligine de toqtaldy.

Baǵyt-baǵdary men maqsaty aıqyndalǵan otyrystan soń jıyn qatysýshylary TMD-nyń syrtqy shekarasyn kúzetý men qorǵaý boıynsha úkimettik tapsyrmalardy oryndaý barysynda Tájik-Aýǵan shekarasynda 1995 jyldyń 7 sáýirinde qaza tapqan İshki áskerdiń 17 qaharman jaýyngerleriniń eskertkishine gúl shoqtaryn qoıdy, atap óterligi, bul is-sharaǵa Ulttyq ulan batyrlary Erbol Otarbev pen Jandos Baıanbaev arnaıy kelip batyrlar rýhyna taǵzym etti.

Osylaı bastaý alǵan jıyn barysy ««Máńgilik el» jalpyulttyq ıdeıasy negizinde Ulttyq ulan jeke quramyn qazaqstandyq patrıotızm rýhynda tárbıeleýdegi áskerı basqarma men jergilikti bılik organdarynyń atqaratyn róli jáne ıdeologıalyq jumystarynyń negizgi baǵyttary»  atty taqyryptaǵy dóńgelek ústelge ulasty. Onyń basty maqsaty óskeleń urpaqty jáne áskerı qyzmetshilerdi jańa qazaqstandyq patrıotızm áleýetinde tárbıeleý boıynsha tárbıeshi ofıserlerdiń kásibı daıarlyq deńgeılerin joǵarylatý jáne áskerdegi ıdeologıalyq jumystardyń durys júrgizilýin uıymdastyrý bolyp tabyldy.

           Dóńgelek ústelge Ońtústik-Qazaqstan oblysy ákiminiń orynbasary Sáken Qanybekov, Ońtústik-Qazaqstan oblysynyń ákimi apparaty jetekshisiniń orynbasary, Qazaqstan halyqtary Assambleıasy sekretarıatynyń meńgerýshisi Muratáli Qalmuratov, S.P. Korolev atyndaǵy № 45 mektep-gımnazıasynyń mektep dırektory           , pedagog-novator, qalalyq máslıhattyń depýtaty Pak Roza Vıktorovna, Ardagerler keńesiniń tóraǵasy zapastaǵy polkovnık Májıt Júsipbaev, «Nur Otan» partıasy ishinen qurylǵan «Jas Otan» jastar qanatynyń tóraǵasy Baýyrjan Moldabekov, sonymen qatar qoǵamdyq jáne ózara is-qımyl birlestiktegi organdardyń ókilderi, Uly Otan soǵysynyń, Aýǵan soǵysynyń jáne eńbek ardagerleri, ınternasıonalıs jaýyngerler, jıyn qatysýshylary, stýdent jastar men BAQ ókilderi qatysty.

Atalǵan shara barysynda Elbasynyń halyqqa joldaǵan Joldaýynyń negizi sanalatyn «Máńgilik el» ıdeıasy aıasynda birshama baıandamalar jasalyp, barlyq qatysýshy ókilderdiń pikirleri tyńdaldy. Barlyq qurylymdar arasynda tájirıbe almasý ótti.

Dóńgelek ústel aıasynda birshama aýqymdy máseleler talqylanyp, otyrys qorytyndylanǵan soń, óskeleń urpaqty otanshyldyq rýhta  tárbıeleýge qosqan úlesteri úshin qoǵamdyq uıymdardyń, jergilikti bılik organdarynyń jáne ózara is-qımyl birlestiktegi organdardyń ókilderin Ulttyq ulan Bas qolbasshysynyń atynan gramotalarmen jáne arnaıy syılyqtarmen Bas qolbasshynyń orynbasary Muhametqalı Qusaıynuly marappattady.

Dóńgelek ústel aıaqtalysymen jıyn qatysýshylary jospar boıynsha ádistemelik-nusqaýlyq, úlgilik jáne tájirıbelik sabaqtarǵa tarasty.